Арадай Хуралай нютаг можонуудай хоорондын харилсаанай, үндэhэтэнэй асуудалнуудай, залуушуулай политикын, ниитын ба шажанай нэгэдэлнүүдэй талаар хорооной ажалай зүблөөн дээрэ Улаан-Yдэ хотын ФСК-да боксоор Олимпиин чемпион Владимир Сафроновай нэрэ үгэхэ гэжэ спортын ветерануудай дурадхал зүбшэн хэлсэбэ. Энэ суглаанда Буряад ороной Спортын Федерацинуудай түлөөлэгшэд, Арадай Хуралай ба Улаан-Yдэ хотын Соведэй hунгамалнууд хабаадаа, - гэжэ Засагай газарай хэблэлэй албан дуулгана.
Энэ хорооной түрүүлэгшэ Валерий Доржиевай тодорхойлhоор, энэ асуудал дүрбэн жэлэй саана Засагай Газарта хэлсэгдэhэн байна, харин шиидхэбэри абтаагүй үлөө.
- 1956 ондо Мельбурн хотодо үнгэрhэн Олимпиадада манай нютагай хүбүүн Владимир Сафронов Советскэ Союзhаа боксоор түрүүшын олимпиин чемпион болоо, - гэжэ Валерий Пурбуевич тодорхойлжо, дурадхал зүбшэн хэлсэхые уряалба.
Социальна политикын талаар хорооной түрүүлэгшэ Игорь Марковец боксын ветерануудай дурадхал дэмжэбэ. ФСК-да Борис Будаевай нэрэ үгэхэ гэhэн ондоо hанал барилдаанай Федераци баримтална. Энэл hанамжа hунгамал Михаил Гергенов дэмжэжэ, дэлхэйн чемпионай нэрэ барилдаагаар hонирходог бүхы хүбүүдтэ мэдээжэ, гэжэ хэлэнэ.
Тиигээдшье, үшөө ондоо hанамжанууд эндэ дурадхагдаба.
