Арадай Хуралай уладай юрэ байдалай талаар хорооной түрүүлэгшэ Александр Стопичевай ойлгуулһаар, түрэлхидэй түлбэри тэхэрюулхэдээ айлай олзо оршо хараада абтадаг болохо.
Мүнөө дээрээ хүүгэдэй сэсэрлигүүдтэй үхибүүгээ ябуулхын түрэлхидэй түлбэринүүд зарим ушарта (эдеэнэй түлөө) нэгэ үхибүүнэй түлөө 20%, хоёрой түлөө 50%, гурбанай түлөө 70 хубиин шэнээн тэхэрюулгэ хэгдэдэг гээд һануулая. Гэхэтэй хамта, 2015 оной декабрь һарада Ородой Холбоондо туһа тэдхэмжэ тусхайтаар үзүүлхэ тухай гүрэн түрын 388 дугаарта хуули абтаһан байна. Тиимэһээ туһа тэдхэмжэнүүд хүнэй ядаһанһаа үндэһэлэгдэн хараалагдаха ёһотой болобо. Тэрээнһээ боложо Буряадай парламентда бэлдэгдэжэ, ноябриин 18-да үнгэрһэн ээлжээтэ сесси дээрэ «Һуралсал тухай» хуулиин 16-дахи статьяда заһалтанууд баталагдаа. Энээниие уламжалан, 2017 ондо хүүгэдэй сэсэрлигэй түлөө түрэлхидэй түлбриин тэхэрюулгэ нэгэ хүнэй ажамидарамжын доодо хэмэй нэгэ хахад олзотой айлнууд гансал абажа шадаха болоно.
- Мүнөөдэрэй байдалаар Буряад орондо ажамидарамжын доодо хэм 9,5 мянга түхэриг бүридүүлнэ, тиимэһээ нэгэ хахадынь гэбэл, нэгэ хүнэй 14,2 мянга түхэриг олодог айл болоно гэхэ гү, али гурбан үхибүүтэй айл һаа һарадаа 43 мянгые олохо хубигүй айл гэһэн удхайтай. Хэрбээ энээнһээ дээшэ олзотой айлнуудта тэхэрюулгэ хараалагдахагүй, - гээд Стопичев тэмдэглэбэ.
Тус хуулиин хүсэн гансал 2017 онһоо сааша жэлнүүдтэ ябажа эхилхэ үхибүүдтэ хабаатай гээд тэрэ онсолоо. Энэ сагта сэсэрлигүүдтэ ябажа байһан хүүгэдэй түрэлхид энэ тэхэрюулгэдэ үхибүүнэйнгээ сэсэрлигээ дүүргэтэр абажа байха жэшээтэй. Иигэжэ хүүгэдэй сэсэрлигэй түлөө тэхэрюулгэ шэнээр гуримшуулгаһаа улас түрын мүнгэн һан 2 сая түхэригөөр арбижан хэмнэгдэхээр багсаамжалагдана.