Залуушуулай ямарш һунгалтануудта хабаадахагүй бэрхэ байдал Арадай Хуралда зүбшэгдэбэ. «Һунгалтанууд залуушуулай нюдөөр» гэһэн сэдэбтэй «Дүхэриг шэрээдэ» парламентын һунгамалнууд, мүн тиихэдэ дээдэ һургуулинуудай оюутад, залуушуулай эмхинүүдэй түлөөлэгшэд хабаадаба. Эндэ ерэһэн оюутад һунгалтануудта ябаагүй гол шалтагаан гэжэ гүрэнэй засаг түрэдэ этигэхэ гээшэ хэсүү гээд нэрлээ.
-Заримдаа хүн һунгалтада ошоходоо нүгөөдэнь бү гараһай гэһэншүү гансал хүсэлтэй байдаг. Анхан «бултые бураашанаб» гэжэ хүсэнэг бюллетень соо байгша һэн. Энээние һөөргэнь бусаагаа һаа, залуушуулшье дуугаа үгэдэг болохо һэн, - Зүүн Сибиириин гүрэнэй технологиин ба хүтэлбэрилгын университедэй нэгэдэхи ангиин оюутан Вероника Рыльская хөөрэнэ.
Тэрэнэй һанамжалхада, эрхэтэд хуули ёһонуудаа хүсэд мэдэнэгүй, залуушуулш, дээшэш наһанай зон тиимэ. Буряадай гүрэнэй университедэй засаг түрэ болон ниитэ шэнжэлэлгын кафедрын профессор Эрдэм Дагбаевай мэдээгээр, Буряад уластахи дээдэ һургуулинуудаар хэгдэһэн тусхай асуултын дүнгүүдээр олонхи оюутад һунгалтануудта яһала һайнаар хандана. Юуб гэхэдэ, бүхы харюусагшадай 42 хубинь һунгалтануудые улад зоной эрхэ хамгаалха арга мүн болоно гээд бодомжолхонь элирээ.
Гэхэ зуура, 18 хубинь һунгалтануудые юундэш хэрэггүй гэбэ, 17 хубинь һунгалтануудые засаг буляалданай зэмсэг гэжэ тоолоно, харин оройдоол 13 хубинь һунгалтые эрхэтэнэй хүндэтэ эрхэ гэжэ һанаһанаа мэдүүлһэн байна.
