Буряад Уласай Мухар-Шэбэрэй аймагта Балта болон Суулга тосхонуудые холбоһон можын харгын заһабарилагдаһан участок ашаглалгада тушаагдаа. Уласай толгойлогшо Алексей Цыденовэй даабаряар ехэ заһабарилга хэгдээ, эдэ зорилгонуудта Харгын жасаһаа 350 гаран сая түхэриг һомологдоо гээд Буряад Уласай засагай газар мэдээсэнэ.
Буряад Уласай тээбэриин, элшэ хүсэнэй болон харгын ажахы хүгжөөлгын сайдай орлогшо Марина Кочеринагай нэмэжэ хэлэһээр, энэ түсэлэй хэмжээндэ нёдондо 10,4 модоной зайда харгы заһабарилагдаа, орохо 46 пандус, 14 шуурган сорго, 130 гаран харгын тэмдэгүүд, дүрбэн автобусай буудалнууд табигдаа.
Энэ 11 модоной зайда, 45-дахи км-һээ 56-дахи км хүрэтэр, асфальтын ажал дүүргэгдэбэ, гэрэлтүүлгэ, хаалтанууд, тротуарнууд, ябаган зоной гаталха газарнууд, автобусай байранууд табигдаа. Харгы зохид, аюулгүй болоо гэжэ нютагай ажаһуугшад хэлэнэ. "Үхибүүд һургуулидаа аюулгүйгөөр хүрэжэ, хэшээлһээ гадуур хэмжээ ябуулгануудта, кружогуудта ябаха аргатай. Шэнэ харгыда мүн лэ гэрэлтүүлгэ бии. Илангаяа үбэлэй сагта, эртэ харанхы болоходо, энэнь шухала. Үхибүүд һургуулиһаа аюулгүйгөөр гаража, тротуарнуудаар аюулгүй ябажа, гэртээ хүрэтэр ябаха аргатай", - гэжэ Суулгын юрэнхы һургуулиин захиралай орлогшо Дарима Дамбиева хэлэбэ.
