Арадай Хуралай Зүблэлэй зүблөөн дээрэ «Буряад Уласта соморлогдоһон болон патентнэ татабариин гуримуудые хэрэглэлгын тодорхой асуудалнууд тухай» № 179-VII уласай хуули хэр хүдэлһэн тухай асуудал хэлсэгдэһэн байна.
Буряад Уласта 32 864 эмхи олзын хэрэг эрхилнэ, тэрэ тоодо 9672 хуулита нюурнууд, 23 192 хубиин олзын хэрэг эрхилэгшэд. 2024 ондо 26 060 татабари түлэгшэд хялбаршуулһан гурим хэрэглэбэ, энэнь 2023 онтой харисуулхада 8,6%-ээр дээшэлээ. Энэ тоодо гурбан шэглэлэй тэдхэмжэ абагшад ороно: анха түрүүшынхиеэ бүридхэлдэ абтаһан гү, али ажал хэрэгээ Буряад Уласта руу нүүлгэһэн, нэмэлтэ ажалай һууринуудые бии болгоһон, УСН-һээ ЕНВД-дэ шэлжэһэн гү, али ЕНВД-тэй бусад гуримуудтай татабариин гуримуудые нэгэдүүлһэн хүнүүд болоно. Тиихэдэ 700-һаа бага хүн зонтой хүдөө һууринуудта ажалладаг зондо тэдхэмжэ үргэдхэгдэжэ, тэдэнэй тоо 5,5 дахин олон болоо.
Арадай Хуралай хорооной түрүүлэгшын орлогшо Михаил Степанов элидхэл соогоо Буряад Уласта абтаһан хэмжээ ябуулгануудай аша үрэтэй, татабариин хүнгэлэлтэ нэбтэрүүлэгдэһэн тухай тэмдэглэбэ.
"Шэнжэлэлгын дүнгөөр Буряад Уласта жэжэ болон дунда хэмжээнэй олзын хэрэг эрхилэлгын ургалтын һайн шэглэл, уласай нэгэдүүлэгдэһэн бюджедтэ татабариин олзо эрид нэмэгдэһэн байна. Энэ баримта уласта олзын хэрэг эрхилэлгын хүгжэжэ байһые гэршэлнэ, Буряад Уласта жэжэ болон дунда хэмжээнэй олзын хэрэг эрхилэгшэдтэ дэмжэлгэ үрэ дүнтэй болоо гэжэ батална", - гэжэ Михаил Степанов тобшолол гаргаа.
