Һургуулиин автобусай парк шэнэлхэ хүтэлбэриин хүреэндэ Буряад Уласай һургуулинууд 31 автобус абаба. Буряад Уласай Арадай Хуралай Түрүүлэгшэ Владимир Павлов болон Буряад Уласай Толгойлогшо Алексей Цыденов автобусуудай түлхюур һургуулинуудай захиралнуудта барюулаа.
"Мүнөөдэр бидэ һургуулиин автобусуудай парк шэнэлхэ талаар үшөө нэгэ шухала алхам хэжэ, үхибүүдэймнай һургуулидаа зохидхоноор, дулааханаар ябахын тула 31 шэнэ автобус дамжуулнабди. Найман жэлэй туршада бүхыдөө 468 һургуулиин автобус Буряад орондо үгтөө, тэдэнэй диилэнхи хубинь федеральна мүнгэнһөө абтаа", - гэжэ Владимир Павлов хэлэбэ.
Бэшүүрэй, Хэжэнгын, Хориин, Тарбагатайн, Ивалгын, Сэлэнгын болон бусад аймагууд, мүн баһа Улаан-Үдэ хотын юрэнхы һуралсалай эмхи зургаанууд, уласай интернадууд, гажалта заһалгын һургуулинууд автобус абаа. Шэнэ автобусууд эгээл холын тосхонуудташье hурагшадай hургуулидаа ошохо ябадалые зохид, аюулгүй болгохо гэжэ уласай парламентын дарга онсолон тэмдэглээ. Автобус бүхэн хэрэгтэй хэрэгсэлнүүдээр хангагданхай, тэрэ тоодо тахографууд, навигацын хэрэгсэлнүүд, хурданай хизаарлагшад, жолоошондо хонходохо тобшонууд бии.
«Буряад Уласай Арадай Хуралай, Буряад Уласай Засагай газарай, нютагай засагай байгууламжануудай урда табигдадаг шухала ажалнуудай нэгэн хадаа хүүгэдые һургуули хүрэтэр аюулгүйгөөр, зохидхоноор абаашалга болоно», - гэжэ Буряад Уласай Арадай Хуралай түрүүлэгшэ Владимир Павлов хэлээ.
