Буряад Уласай Зэдын аймагта хонин ажахы хүгжөөлгын ерээдүй тухай хэлсэгдэһэн байна. Аймагай засаг дарга Валерий Шагжитаровай хэлэһээр, энэ һалбари саашадаа хүгжэхэ ехэ арга боломжотой. Зэдын аймаг уластаа хониной тоогоор саг үргэлжэ түрүү һуури эзэлнэ (Буряад Уласай 301 мянганайнь 53 мянган толгойнь Зэдэдэ байна).
Буряад Уласай Хүдөө ажахын яаманай мал ажахын, үүлтэрэй ажалайболон загаһанай ажахын таһагые дарга Андрей Попов хонин ажахынуудта үсхэбэрилгын соёл, технологи дээшэлүүлхэ хэрэгтэй гэжэ гол анхаралаа хандуулба.
Ород Уласай Буддын шажанай заншалта Сангхын толгойлогшо, Хамба лама Дамба Аюшеевэй үүсхэһэн түсэл мүн лэ хонин үсхэбэрилгэ хүгжөөлгэдэ горитойхон хубитаяа оруулна. Зэдын аймагта “Ниигэмэй хонин һүрэг” гэһэн түсэлэй куратор Цырен-Доржи Аюшеев тус түсэлдэ хабаадахадаа буян үйлэдэхэ шухала гэжэ тэмдэглэбэ, “юундэб гэхэдэ, тэрэнэй удха ганса малай тоо олошоруулха, бэлшээриин малтай болохын хажуугаар буддын шажанай гол заршамуудай нэгэн үгэлигэ үйлэдэжэ буян ололго мүн."
Дүхэриг шэрээгэй дүнгөөр, Зэдын аймагта хонин ажахы хүгжөөхэ талаар дунда болзорой концепци бэлдэхэ тухай шиидхэбэри абтаа.
