Буряад Уласай Арадай Хурал Баунтын эвенкын аймагай Дээдэ Ципикан тосхон болон Сэлэнгын аймагай Заозерный тосхон татан буулгаха тухай шиидхэбэри абаа. Нютагай өөһэдын хүтэлбэриин зургаанууд - Баунтын эвенкын аймагай депутадуудай зүблэл болон Сэлэнгын аймагай депутадуудай зүблэл иимэ үүсхэл гаргажа Арадай Хуралда хандаһан байха юм.
Баунтын эвенкын аймагай Дээдэ Ципикан тосхон “Багдаринай” хүдөөгэй сомондо ородог, тэрэ Багдарин һууринһаа 100 км тухай газарта, Ципикан тосхонһоо баруун урагшаа 45 км Ципикан голой баруун эрьедэ оршодог. 2002 онһоо тэрэ тосхондо хүн байдаггүй, гэр байшан үгы, ямаршье холбоогүй, гансал саарһан дээрэ бии гэжэ тоологдодог.
Харин Заозерный тосхон 1969 ондо сэрэгэй анги гэжэ байгуулагдаһан, мүнөө Гусиноозерскын хилэдэ ородог болоһон. Тэндэ инженернэ, унаа тээбэриин болон ниигэмэй дээдэ бүтэсэнь хамта болоһон. Гэхэтэй хамта, усалай болоһон ушарһаа энэ тосхоной гэрнүүдтэ халаалтын системэ һандарһан, ажаһуугшад нүүлгэгдэһэн, харин мүнөө хотын бүридэлдэ оруулагдажа гэр байра заһабарилагдаха арга бии болохо. Гусиноозерск хотын генпланда Заозернын хүгжэлтэ хараалагдана.
Сессидэ депутадууд МСУ-гэй зургаануудай хандалга дэмжэжэ, тогтоолнуудай түсэлнүүдые баталан абаа.
