Буряад Уласта онсо ушаралта байдалай болоо гээшэ һаань, гадаада эрхэтэд Холбоото Ород Уласай эрхэтэдтэл адли эрхэтэй байха юм. Тиимэ заһабаринуудые Буряад Уласай ээлжээтэ сесси дээрэ һунгамалнууд баталан абаа.
Буряад Уласай Арадай Хуралай гүрэнэй байгуулалтын, нютагай өөһэдын хүтэлбэриин, хуули ёһоной болон гүрэнэй албанай талаар хорооной түрүүлэгшэ Виктор Малышенко энээн тухай бэшэг баримта сессидэ үзүүлээ юм.
“Тус бэшэг баримтын ёһоор, гадаада эрхэтэд болон эрхэтэнэй зэргэгүй хүнүүд Холбоото Ород Уласай хууляар тогтоогдоһон гурим соо онсо ушаралта байдалһаа хүн зониие болон газар дэбисхэр хамгаалха, эмнэлгын туһаламжа хүргэлтын талаар Холбоото Ород Уласай эрхэтэдтэл адли эрхэ олгогдохо болоо”, - гэжэ Виктор Малышенко тэмдэглээ.
Федеральна хэмжээндэ иимэ эрхэ гадаада эрхэтэдтэ болон Холбоото Ород Уласта саг үргэлжэ ажаһуудаг эрхэтэнэй зэргэгүй хүнүүдтэ онсо ушаралта байдалһаа тэдэнэй бэедэ болон эд зөөридэ болоһон хохидол хүсэлдүүлгэ хараалагдаһан байдаг юм. Тэрэшэлэн Холбоото Ород Уласта саг үргэлжэ ажаһуудаг гадаада эрхэтэдтэ гарза хүсэлдүүлгын ба ниигэмэй халамжын туһа үзүүлэлтын талаар эрхэ болбол Холбоото Ород Уласай уласхоорондын хэлсээнүүдэй ёһоор бэе бэедээ туһалха гэһэн ёһо заршамаар хэгдэхэ. Гадаада эрхэтэд болон эрхэтэнэй зэргэгүй хүнүүд элүүрые хамгаалха тухай Холбоото Ород Уласай хуулида тогтоогдоһон гуримаар эмнэлгын туһаламжа (эмнэлгын туһалажа үзүүлхэ талаар) абаха эрхэтэй.
