Ниитын тээбэридэ шиидхэгдээгүй асуудалнууд бии гэжэ Буряад Уласай Толгойлогшо Алексей Цыденов хэлээ. Ноябриин 28-най шууд эфирэй үедэ хотынхид ниитын тээбэриин ажалда гомдолоо оруулһан байна. Тиин, холын микрорайонуудай ажаһуугшад үглөөндэ унаада һууха аргагүй байһан тухайгаа хэлээ, автобусууд пиг дүүрэн байна, тээбэриин ерэхые удаан хүлеэхэ болон оройн 20:00 сагһаа хойшо маршруткануудай алга байлга тухай хэлээ. Хүнүүд удаан саг хүлеэхэ гү, али гэртээ ондоо аргаар хүрэжэ ошохо баатай байһан тухайгаа хэлээ.
Уласай толгойлогшын тэмдэглэһэнэй ёһоор, энэ жэл шэнэ автобусууд абтаа, тэдэнэр шугамда үшөө гараагүйл байна.
- Бидэндэ 154 шэнэ автобус байна, тэдэнэрэй зариманиинь үшөө шугамда табигдаагүй байһанинь 67 автобус. Үшөө иимэ тоо шугамда гараха, тиигэжэ зөөлгын шанар һайн болохо бэзэ гэжэ найданабди, - гэжэ толгойлогшо хэлээ. – Альтернативна – муниципальна тээбэриин бии болоходо, хубиин тээбэриин жолоошодтой хөөрэлдэхэдэшье амар, тэдэнэр дүримөө сахиха болоно, хүдэлхэ зайгаа баримтална. Муниципальна тээбэриин үгы байхада, тэдэнэр өөһэдынгөө ашаг талые түбхын түрүүндэ табина. Тиимэһээ бидэ муниципальна тээбэри худалдан абаха замаар ябанабди.
Цыденов иигэжэ тэмдэглээ, хубиин тээбэриинхидтэ баһал бэлэн бэшэ байна. “Юумэнэй үнэ сэн нэмэнэ: сэлбэгүүд, сахригууд үнтэй болоно. Энэнь баһал тэдэнэй ажалда нүлөөлнэ. Эдэ бэрхэшээлнүүдые ойлгожо байжа, асуудалнуудые шиидхэхэ болонобди”, - гэжэ уласай толгойлогшо тэмдэглээ.
