Буряад Уласай Арадай Хурал болон Ростов можын Хуули зохёон байгуулдаг Суглаан парламентнууд хоорондын харилсаха тухай хэлсээ баталба. Буряад Уласай Арадай Хуралай Түрүүлэгшэ Владимир Павлов болон Ростовой можын Хуули зохёон байгуулгын Суглаанай түрүүлэгшэ Александр Ищенко гэгшэд энэ баримта бэшэгтэ гараа табиһан байна.
"Энэ хэлсээндэ парламентнууд хоорондын хамтын ажал хүгжөөхэ, хүндэлэлэй, тэгшэ эрхын, бэе бэеынгээ һонирхолые хараадаа абалгын заршамууд дээрэ үндэһэлжэ, хуули зохёон байгуулгын дүй дүршэлөөрөө андалдаха талнуудай үүргэ элирхэйлэгдэнэ. Тус баримта бэшэг хоёр можын хуули зохёогшодой хоорондохи хамтын ажаллалгын зорилго болон заршамуудые тодорхойлһон 12 статьяһаа бүридэнэ", - гэжэ можын парламентын хэблэлэй албанууд дуулгаба.
Владимир Павловай тэмдэглэһээр, хоёр можо нютагуудай хоорондохи хамтын ажалай хэлсээндэ гараа табиһаниинь парламентнууд хоорондын хамтын ажал хүгжөөлгын шухала хэмжээн болоно.
"Хуули тогтоохо дүршэл, парламентын хиналтатай, бүтээлшэ дурадхалнуудаар солилсожо, бидэ нютаг дэбисхэрнүүдэйнгээ хүгжэлэй шухала асуудалнуудые шиидхэхэ ниитэ аргануудые үрэ дүнтэйгөөр хүгжөөжэ шадахабди." Гол зорилгомнай – ажаһуугшадай ажабайдал һайжаруулха, тусхай операцинуудай хүсэндэ хабаадагшадта туһалха, манай сэрэгшэдые дэмжэжэ байһан Ростов можын бүхы ажаһуугшадта баяртайбди гэжэ Павлов онсолон тэмдэглэбэ.
