2022 ондо Буряад Уласай хүдөө ажахын үйлэдэбэриин ажалай дүнгүүдые ноябриин 18-да засагай газарай зүблөөн дээрэ гаргаа. Ажалай уулзалгын үедэ Арадай Хуралай һунгамалнууд энэ шэглэлэй хүгжэлтын талаар саашанхи хараа бодолоо хэлсээ, мүн баһа хүдөө ажахын һалбариин элитэ ажалшадта баярай бэшэгүүд барюулагдаа.
2022 ондо хүдөө ажахын һалбарида федеральна болон уласай бюджедүүдһээ 2 миллиард тухай түхэриг һомологдоо. Иимэ дэмжэлгын ашаар хүдөө ажахын һалбари хүгжэлтын тогтомол харгы замдаа гараа, тиигэжэ мүнөө дээрээ Буряад Уласта мяхаар хангалта тогтууритай хэмжээндэ байна гэхэ гү, али тэрэнь 68% хүрэнэ.
Газарай асуудалнуудай, хүдөө ажахын болон хэрэглэгшэдэй заха зээлиин талаар Арадай Хуралай хорооной түрүүлэгшэ Дмитрий Швецовой тэмдэглэһэнэй ёһоор, энэ хэмжээ ябуулга болбол саашанхи түсэб табихада ехэ шухала байна, юундэб гэхэдэ, тэдэнэй хороон хүдөө ажахын яамантай тон нягта холбоотой, тиигэжэ хоорондоо харилсажа хүдэлһэнэй ашаар тэдэндэ саашанха түсэбүүдөө табихадань болон уласай бүхы ажаһуугшадай һайн байдалай түлөө ажалаа зохёон байгуулхадань туһа болоно.
- Бидэ хоол хүнэһэнэй аюулгүй байдал хангаха, ажалай байра бии болгохо, хүдөө ажахы хүгжөөхэ талаар уласай ажаһуугшадай һайн байдалай түлөө хүдэлхэ ёһотойбди, - гэжэ тэрэ хэлэһэн байха юм.
