Буряад Уласай газар дэбисхэр дээрэ онсоор харууһалагдадаг байгаалиин газарнуудай ажаябуулга тухай Арадай Хуралай ээлжээтэ 22-дохи сессиин үедэ «Засаг газарай сагай» үедэ мэдээсэл шагнагдаба. Буряадай Засагай газарай Түрүүлэгшын орлогшо Иван Альхеев элидхэл хэхэдээ, энэ талаар тодорхойгоор хөөрэжэ үгэһэн байна. Буряадай хүреэлэнгэй газар 3241,5 мянган гектар болодог, федеральна зиндаагай 3 хүреэлэн тоологдоно, үндэһэтэнэй 2 сэсэрлиг, байгаалиин 15 заказник, тэдэнэй тоодо федеральна зиндаагай 3 заказник ороно.
Баргажанай гүрэнэй байгаалиин биосфернэ хүреэлэнэй болон Забайкалиин үндэһэтэнэй паркын захирал Михаил Овдиной тэмдэглэһээр, байгаалияа хамгаалха, гүрэнэй хүреэлэнгүүдые сахиха, хадагалха талаар ехэ ажал ябуулагдана.
-Үндэһэтэнэй сэсэрлигүүд хадаа тон онсоор харууһалагдадаг газар гээшэ. Байгаалиин болон соелой баялигуудые хадагалжа хүдэлхэ гээшэ мэргэжэлтэдэй гол ажал болоно, - гээд Михаил Овдин тэмдэглээ.
Сессиин үедэ үнгэргэгдэһэн энэ ябуулга дээрэ Буряад Уласай газар дэбисхэр дээрэ онсоор харууһалагдадаг байгаалиин газарнуудай ажаябуулгын талаар гарадаг бэрхэшээлнүүд тухай хөөрэжэ үгөө. Бог шоройн асуудалда анхарал хандуулха тухай хандаһан байна. Мүн тиихэдэ загаһа барилгын талаар хуули нарижуулха, аяншалгын ифраструктура хүгжөөхэ, үндэһэтэнэй экологиин зам байгуулха тухай дурадхалнуудые оруулаа. Гэхэ зуура аяншалгын талаар сахин хүгжөөлгэ, интернет оруулга тухай асуудалнууд шухала гээд хэлэгдэһэн байна.
Арадай Хуралай һунгамалнуудые энэ талаар элдэб асуудалнууд һонирхуулаа. Транспортна инфраструктура хүгжөөлгэ, бог шоройн асуудал, аяншалга хүгжөөхэ, газар талмайнуудые бүридхэлгэ болон бусад бэрхэшээлтэ асуудалнууд хэлсэгдэһэн байна.
Буряад Уласай газар дэбисхэр дээрэ онсоор харууһалагдадаг байгаалиин газарнуудай ажаябуулга тухай хэгдэһэн мэдээсэл Арадай Хуралай һунгамалнууд хараадаа абажа, хэдэн дурадхалнуудые оруулаа. Тогтоолой проект абтажа, Буряад Уласай Засагай газара аяншалгын-рекреационно һууриниие Байгал шадарай хажууда байгуулха, ООПТ-эйн материально-техническэ хангалта хубилгаха тухай хэлэгдээ.
«Кабанскын аймаг», «Баргажанай аймаг» гэһэн нютагай засагай байгуулалтануудта оршодог ООПТ-эйнуудые региональна удхатай болгохо, «Хурамхаанай аймаг» гэһэн нютагай засагай байгууламжада газар талмай һомолжо, «Джергинский» гүрэнэй хүреэлэн» барилгын түб байгуулха тухай хэлсэгдэһэн байна.
