Буряад Уласай Арадай Хуралай түрүүлэгшэ Владимир Павлов Мухар-Шэбэрэй аймаг ажалай хэрэгээр ошобо. Энэ жалай хэрэгээр ябалгада Газарай асуудалнуудай, хүдөө ажахын политикын ба эд хэрэглэлгын дэлгүүрэй талаар хорооной түрүүлэгшэ Дмитрий Швецов, hунгамалнууд Александр Савельев, Александр Бардунаев, Найдан Чимбеев хабаадаба.
Дээдэ Хуралай гэшүүд Шаралдай нютагай Ананинтанай бүлын малай фермэ ошожо хараба. Энэ КФХ 1 миллион 300 мянган түхэригэй грант абажа, үйлэдбэриин ажал 2012 ондо эхилhэн байна. Тэрэ сагта энэ ажахы 68 бодо малтай байгаа. Ирина ба Николай Ананинтан хүдөө ажахын ургамал ургуулжа эхилhэн байна. 2016 ондо фермернүүд hүнэй үйлэдбэриин фермэ хүгжөөхэ хэрэгтэ 8 013 мянган түхэригэй грантда хүртөө. Энэ тэдхэмжын hайгаар шэнэ hаалиин фермэ ба оньhон түхеэрэлгэнүүдые абаа. Ажахы мүнөө ехэ урагшатай хүгжэнэ. 200 толгой малтай, нэгэ үнеэнhөө 3900 кг hүн hаагдана. Һүеөө Буряад Уласайнгаа дэбисхэр дээрэ худалдана. Ехээр худалдан абагшадай нэгэн Бэшүүрэй аймагай тоhо үйлэдбэрилгын завод болоно. Арадай Хуралай түрүүлэгшэ Владимир Павловай тэмдэглэhээр, фермер гүрэнэй тэдхэмжэ hайн дүнтэйгээр хэрэглэжэ шадаа:
- Һайн шанартай фермэ баригданхай, үйлэдбэриин оньhон түхеэрэлгэнүүдтэй. Малда тааруу, тэнсүүритэй болгогдоhон хоол бэлдэхэ аргатай. Нёдондо жэлдэ 283 тонно hүн абтаhан байна, нэгэ үнеэнэй hаам ехэ. Мүнөө үеын түхеэрэлгэнүүд hайн шанартай hү абалгада туhатай.
Арадай Хуралай түрүүлэгшэ Владимир Павлов hая байгуулагдаhан Святослав Дашабальжировай КФХ-тай танилсаа. Фермер ажахыгаа 2020 ондо байгуулаа. «Поддержка начинающих фермеров» гэжэ программада орожо, 5 млн түхэригэй грантда хүртэhэн байна.
Арадай Хуралай түрүүлэгшэ нэгэ жэл соо фермер hайн дүнгүүдые туйлаhыень тэмдэглэбэ.
Буряад Уласта фермернүүдые дэмжэлгын хэдэн программанууд бэелүүлэгдэнэ. Бага хэмжээнэй ажахынуудай хүгжэлтэдэ субсидинүүд, грантнууд, хүнгэлтэтэй кредит үгтэнэ. Буряад Улас мүнөө 62 % өөрын үйлэдбэриин hүөөр хангагданхай. Шухала зорилгонуудай нэгэн – уласайнгаа зониие өөhэдын эдеэгээр хангалга болоно, -гэжэ Владимир Павлов хэлэбэ.
