Арадай Хуралай hунгамал Игорь Марковец Загарайн аймагта эмэй сангай орёо асуудал хиналта дороо абаба. Буряад Уласта аймагай 4 нютагуудта эмэй сангууд үгы байна гэжэ прокуратура элирүүлhэн байна. Эгээ дүтэ эмэй сан эдэ нютагуудhаа 20 модо саана оршодог.
«Горхоной» гэжэ hууринда эмшэлгын амбулатори бии, тиимэhээ уласай хуулиин ёhоор, тэндэ эм наймаалха аргатай байна. Энэ шалтагhаа прокуратура нютагай амбулаторида эмэй сан эмхидхэн байгуулха тухай Загарайн аймагай түбэй эмшэлгын газарта зарга барижа сүүдтэ хандаба. Аймагай сүүд энэ заргые ханабашье, харин түбэй эмшэлгын газар Буряад Уласай Дээдын сүүдтэ гомдол барижа, энэ шиидхэбэри амжалтатай болюулаа. Прокуратура урдаhаань дээшэнь бариhан гомдол ябуулаа. Энэншье баhа хангагдажа, тиимэhээ хэрэг дээшэнь бариhан гомдолые харадаг, шииидхэбэри гаргадаг сүүдтэ бусаагдаба. Харин арад зон эмэй сангүй мүнөө болотор байhаар. Буряад Уласай Элүүрые хамгаалгын яаман энэ байдал тухай иигэжэ хэлэбэ:
- Загарайн аймагай түбэй эмшэлгын газарай дуулгаhаар энэ амбулаториин байшан соо эм наймаалха сан нээхэ аргагүй, юундэб гэхэдэ ариг сэбэрые хангалгын ба халдабарита үбшэнhөө hэргылэмжын эрилтэнүүдтэ байшан тааранагүй. Энэ эмхиин хүсөөр эндэ ажаhуудаг зондо эм асаржа, худалдаха арга эмхидхэгдэбэ. 2021 ондо шэнэ фельдшерэй ба акушерэй пункт барилга ба эм наймалха лицензи абалга түсэблэгдэнхэй.
Арадай Хуралай hунгамал, социальна политикын хорооной түрүүлэгшэ Игорь Марковец Загарайн аймагта эмэй сангай орёо асуудал хороонойнгоо хиналта дороо абаба.
- 2021 ондо ФАП барилга ба барилгын саг болзор тухай мэдээсэл тодоруулхын тула Буряад Уласай Элүүрые хамгаалгын яаманда албан ёhоной hуралга эльгээгээб. Энээнэй хажуугаар Загарайн аймаг албанай хэрэгээр ошожо, ажаhуугшадтай уулзалга түсэблэгдэнхэй. 21-дэхи зуун жэлдэ эмээр хангагдаха аргагүй байха гэжэ болоогүй.
