Буряад Уласай Арадай Хуралай экономическа политикын хорооной түрүүлэгшын орлогшо Светлана Будаева мартын 5-да үнгэрhэн Арадай Хуралай ээлжээтэ сесси дээрэ хараалагдаhан социальна шэглэлэй хуулиин проектнууд тухай хөөрэжэ үгэбэ. «Дайнай үхибүүд» гэhэн зэргэтэй эрхэтэдтэ, зүгөөр 1928 оной январиин 1- hээ 1945 оной сентябриин 2 болотор түрэhэн зондо туhаламжа хүргэхэ тухай хоёр хуули абтаа. 1-дэхинь, протезнэ-ортопедическэ бүтээлнүүдээр хангалга, 2-дохинь, Агууехэ Эсэгэ ороноо хамгаалгын дайнай Илалтын 75 жэлэй ойн баярта дашарамдуулан, 2000 түхэриг бэлэг барилга. «Эгээн түрүүн бүхы дайнай үхибүүдтэ түлбэри үгтэхэ гэжэ асуудал байгаа, харин энэ хэрэгтэ аяар 80 миллион түхэригhөө ехэ мүнгэн хэрэгтэй байhан дээрэhээ, hара бүхэндэ 500 түхэригэй тэдхэмжэ абадаг зондо энэ мүнгэ үгэхэ гэжэ шиидхэбэри абтаа. Энэ 5746 хүн болоно. Эдэ зоной дундаhаа 1200-дань ортопедическэ гутал гү, али протезнүүд хэрэгтэй. Энэ хэрэгтэ 5 миллион түхэриг тухай мүнгэн бюджетhээ hомологдохо болоно.
Дайнай ветерануудта 10 мянган түхэриг, ара талын ажалай ветерануудта 5 мянган түхэриг нэгэ дахинай түлбэреэр үгтэхэ гэжэ хуули баталагдаа. Энэ түлбэринүүд федеральна түлбэри дээрэ Буряад Уласhаа нэмэгдэхэ.
Наhа бараhан дайнай ветерануудай наhанайнь нүхэрнүүдые байраар хангаха гэhэн үшөө нэгэ асуудал байна. Мүнөө үедэ Буряад Уласта нүхэрөө алдаhан 5 эхэнэрнүүд хуулиин ёhоор энэ туhаламжада хүртэхэ эрхэтэй. Эдэ зониие байраар хангаха гү, али гэр абаха субсиди түлэхэ гэhэн мүнгэн бюджет соо хараалагданхай.
