Арадай Хуралай ээлжэтэ сессин хоердохи уншалга дээрэ hунгамалнууд «1941 оной январиин 1-hээ 1945 оной сентябриин 2 болотор түрэhэн зондо ниигэмэй тэдхэмжын хэмжүүр тухай» гэhэн Буряад Уласай хуулида заhабари нэмэлтэ абаба. Мүнөө «дайнай үеын үхибүүд» нэмэгдэhэн hара бүриин нэмэри түлбэри – 500 түхэриг абаха болобо.
Гүрэнэй дээдын Хуралай сесси дээрэ Ниигэмэй политикын Комитедэй түрүүлэгшэ Игорь Марковец иигэжэ дуулгаба: «Энэ шэнэлгын зүйл зургаа мянган тэдхэмжэ абадаг зондо хабаатай. Иимэ түлбэри Буряад Уласай толгойлогшын гар табиhан сагhаа түлэгдэжэ эхилхэ. Июнь соо парламентын сесси дээрэ хэрэгтэй заhан сэхэлэлгэ уласай бюджедтэ оруулагдаха».
«Дайнай үеын үхибүүд» гэhэн тэдхэмжэ наhатай хүнэй ондоо олониитэдэ хабаатай дэмжэлгээр хангагдаагүй байгаа hаань, түлэгдэхэ гэжэ hануулая. Манай Буряад орон «Дайнай үеын үхибүүд» гэhэн хуули эгээ түрүүн баталhан нютаг можонуудай нэгэн гээшэ. Иимэ хуули Оросой холбоото Уласта гансахан зургаан нютаг можодо хэрэглэгдэнэ. Энэ хэрэгтэ бюджет сооhоо 37 млн 926 мянган түхэриг жэлдээ hомологдоно.
Арадай Хуралай түрүүлэгшэ В.Павловай тэмдэглэhээр, энэ хэмжээ ябуулга манай арадай ядаруу байдалые хараада абахада, илангая,НДС-эй дээшэлхэ үедэ, эдеэ хоолой, эд бараанай, гэр байрын түлөө түлбэриин сэнгэй нэмэхэ сагта тон шухала.
