Яруунын аймагай Гүндын, Тулдунай, Иисингын, Целиннын дүрбэн hургуулиин багшанар Арадай Хуралда хандажа, hунгамалнуудhаа түлеэнэй түлишэ мүнгөөр хангалгын талаар туhа эрибэ. Бэшэг сооhоо, энэ жэлэй апрелиин хоёрто Буряад Уласай засагай газарай 466-дахи постановленидэ заhабари нэмэлтэ оруулhанай hүүлдэ орёо асуудал бии болоо,- гэжэ Восток – Телеинформ гүрэнэй дээдын хуралай мэдээсэлэй албанhаа дуулгаба.
Шэнэ ёhо гуримаар хүдөөгэй hургуулиин багшанар хангалгын мүнгэ абахын тула, түлеэ гү, али шулуу нүүрhэ абаhанаа гэршэлhэн саарhа данса харуулха ёhотой болоно. Энэ ороhон хандалгаар Хуралай hунгамалнууд хэдэн зүблэлтэ суглаа үнгэргэбэ. Хүдөө нютаг бүхэндэ саарhа данса үгэжэ, түлишэ наймалдаг эмхинүүд, олзын хэрэг эрхилэгшэд үгы байhан тухай эндэ онсо тэмдэглэгдэбэ. Тиимэhээ, багша бүхэн хангалга абахаяа, шэнэ эрилтын ёhоор, данса харуулха аргагуй болоно.
- Хүдөөгэй hургуулиин багшанарай түлишэ хангалга Арадай Хуралай хуулиин тогтоолоор батажуулагданхай гэжэ тэмдэглэхэ хэрэгтэй. Харин гаргаша хүсэлдүүлгын гурим Буряад Уласай Засагай газараар тодорхойлогдоно. Энэ асуудал дээдэ хуралай хиналта доро абтаба- гэжэ Арадай Хуралда тэмдэглэбэ.
