Табадахи зарлалай Арадай Хуралай ниитын приемно руу дүн хамта 3300 гаран хандалга улас ороной улад зонһоо ороһон байна. Тэдэнэй 1880-нь бэшэмэл, 1451-нь сээжэ гээд бүридхэгдэбэ. Булюу олонхинь хуули ëһонуудаа гуримшуулжа, хүн зоной эрхэнүүдые зүб мүрөөр хамгаалхатай холбоотой байгаа, гээд Восток-Телеинформ парламентын хэблэлэй албанай мэдээсэл дууряан, дуулгана.
Тулюар байдалтай, гэр байраар ядалдаһан эрхэтэдэй, һандаржа, һалаха туйлдаа хүрэһэн байраһаань зөөлгэхэ, мүн бусадшье, тэрэ тоодо, гэр-байра хангалгын түлбэринүүдыень хүнгэдхэхэ мэтын бэрхэшээлнүүдые усадхаха тухай асуудалнууд олон байба. Юрэдөө, дулаагаар, зайн галаар хангалгын сэнгүүдэй дэшэлхэнииь, гэр-байрануудые хангаха албангуудай дутуу дунданууд, гэрээ табиха газарнуудые, барилга хэхэ модо г.м. хубааха тухай асуудалнууд ажаһуугшадай һанаа зобооно. Тиигээдшье, мүнгэн туһаламжа эриһэн хандалганууд мүн лэ үсөөн бэшэ.
Гадна, Ородой Холбооной болон Буряад уласай хуули ëһонуудта хубилалтануудые оруулха тухай дурадхалнууд нэгэтэ бэшэ ороо. Эдэ булта хандалганууд саг соогоо үзэгдэжэ, хандагшадта тодо харюу үгэхыень һалбари бүхэнэй хүтэлэгшэ зургаануудта дамжуулагдаһан байна. Хубиин асуудалаар Арадай Хуралда хандагшадые парламентын түрүүлэгшэ, тэрэнэй орлогшонор, хороонуудай түрүүлэгшэнэр саг үргэлжэ угтан абажа, нюур нюураараа уулзаһан байна гээд тэмдэглэе. Тэрээнһээ гадуур, интернедэй аргаар дамжуулагдаһан хандалгануудта харюунууд ходол үгтэжэ байгаа.
