Улас түрын парламентын оршондо «Хүдөө нютагуудые хүгжөөхэ арга боломжонууд» гэһэн гаршагтай «дүхэриг шэрээ» үнгэргэгдэбэ. Энэ хэмжээ ябуулга «Агроаяншалга хүдөө нютаг хүгжөөхэ хэрэгтэ» гэһэн хуралдаанай үргэлжэлдэ эмхидхэгдэбэ. Тэрээниие Арадай Хуралай Газарай асуудалнуудай, хүдөө ажахын түрын болон эд хэрэглэмжын дэлгүүрэй хороон үүсхэн эмхидхэһэн байна.
Хорооной түрүүлэгшэ Александр Попов: «Буряадай гүрэнэй хүдөө ажахын академи грант шүүжэ, уласхоорондын түсэлдэ хабаадаха аргатай болоо. Тэндэ Германи, Чехи, Казахстан болон Ород улас хабаадуулагданхай. Тиигэжэ БГСХА-да «Түбхинэһэн хүдөө ажахы болоод хүдөө нютаг хүгжөөлгэ» гэһэн магистр зиндаагай заршам хүтэлбэр нэбтэрүүлэгдэжэ байнхай», - гээд хөөрэжэ үгэбэ.
«Дүхэриг шэрээдэ» хабаадагшад Буряад уласта хүдөө ажахы хүсэд хүгжэнэгүй гээд һанамжална. Гансал гүрэнэй мүнгэ эдлэһэнэй ашаар тэрэ ажамидарна ха, харин хажуугаарнь ондоо арганууд үгы шахуу, жэшээнь, агроаяншалга мэтэ арга боломжонууд тоогдоогүй үлэһэн зандаа.
«Дүхэриг шэрээдэ» элидхэгшэд Буряад уласта энэ талаар ямар байдал тогтонхойб гэжэ тоосон соносхоо. Чехиин университедэй профессорнууд Михаль Лоштак болон Иржи Зелена гэгшэдэй эко-тамгалга болоод эдеэ хоол болбосоруулха талаар шэнэ аргануудые хэрэглэхэ тухай мэдээсэлнүүд олоной һонирхол татаһан байна. Профессор Александр Мерзловай Ородой гүрэндэ «Таряашадай халуун угтамжа» гэһэн уласхоорондын зиндаата нэрэ хүндэ тухай хөөрэхэнь баһал һонирхолтой байба.
Буряад уласта хүдөө ажахын арга нүхэсэлнүүд тухай аяншалгын «ЖАССО-ТУР» бүлгэмэй генеральна зарлал Светлана Цыбикдоржиева өөрын талаһаа бодомжолоо. «Дүхэриг шэрээгээ» дүнгүүдээр Буряад Уласай засаг зургаануудай һонорто тусхай дурадхалнууд бүридхэгдэһэн байна.
