Толгойлогшо хото шадархи аймагаар мартын 13-да ябажа ерээ. Тэрэнэй хэлэһээр, бусад аймагуудай дунда Загарайн аймаг яһала барагтайгаа үзэгдэбэ. Нютагай захиргаанай алдуу эндүүнүүд балай харагдаагүй, гээд Восток – Телеинформ дуулгана.
Юрэнхы дээрээ, засагай зургаанда зааха дутуу дунданууд обёорогдоогүй. Бэрхэшээлнүүд хаанашье байгаа юм аабза. Дутуу дундануудшье, амжалта туйлалтануудшье хаа хаанагүй байдаг. Бүхэлеэр абахада, засагынь һайн хүдэлнэ, - гээд уласай толгойлогшо тунхаглаа.
Энэ удаа Алексей Цыденов Доодо Таласа нютагта фельдшер-акушерай түб, тиихэдэ Шэнэ Онохойн юрэнхы гэгээрэлэй һургуулиин дэргэдэ тамирай танхим гэхэ мэтэ газарнуудые нээлгэнэй баяр ёһололдо хабадалсаһан байна. Удаань, Буряад Уласай толгойлогшо «1019-рай сэрэгэй заһабарилгын завод» хүрэһэн байжа, тэндэхи түрүү ажалшадые шагналгын ёһолол үнгэргөө.
Гадна, аймагай ажаһуугшадтай уулзажа хөөрэлдөөд, Засагай Газарай тушаалтадта зарим тэды даабаринуудые даалгаа.
Мартын 15-да буряад Уласай Толгойлогшо Алексей Цыденов жэл үнгэрһэнэй удаа ажалайнгаа хэрэгээр Кабанскын аймаг дахин хүрэбэ. Энэ удаа нютагай зонтой дүрбэн уулзалга үнгэргөө, бэрхэшээлнүүдыень шагнаа. Тэндэ омоли загаһа барилгын хоригдоһон тухай, ариг сэбэрэй талаар эрхэ байдал тухай болоод олзын хэрэг эрхилхэ тухай гэхэ мэтэ асуудалнууд соностобо.
