Хитадай «Value Development Group.ltd» бүлгэм Байгалай эрье дээрэ асари томо зохид буудалай байшан бариха хүсэлтэй. Энээн тушаа хэлсээн Улаан-Үдэдэ баталагдаба. Буряадай талаһаа Улас мужа хүгжөөлгын жаса хэлсээ баталаа. Тус хэлсээн хүршэ ороной түлөөлэгшэдэй айлшалалгын оршондо дашарамдуулагдаһан байна.
Буряад Уласай Худалдаа наймаанай – эд үйлэдбэриин палатын дуулгаһаар, түсэбэй дансаануудай ёһоор ганса холлой талмай 100 дүрбэлжэн метр эзэлмэ 660 номертой отель баригдахаар хараалагданхай.
Хитадай түлөөлэгшэд Буряад орондо мүнгэ ашаглаха аргануудые шэнжэлхэеэ бууһан байна гээд һануулая. Айлшалалгын үедэ тэдэ элдэб хэмжээндэ уулзалгануудые үнгэргөө. Ашагта малтамалнуудые олзоборилгын болоод хүдөө ажахын, аяншалгын гэхэ мэтэ һалбаринуудаар айлшад һонирхоно. Гэхэ зуура Буряад Уласай Худалдаа наймаанай – эд үйлэдбэриин палатын ба «Хитадай эдэй засагай шэглүүлэмжын түбэй» дэргэдэ республика руу инвестици шэглүүлгын боломжонууд тухай мэдээсэлнүүдые андалдажа байха ажалай бүлэг байгуулая гэһэн дурадхалаа оруулаа.
Дурсагдаһан түсэл юрэнхы дээрээ түрүүшыншье бэшэ. Хитадай инвесторнууд Байгалай эрьеэр энэ мэтын хараа бодомжонуудые үнихэнэй бэелүүлхээр забдадаг. Жэшээнь, хитадай Nikolay Land Port Construction Co., Ltd компани «Байкальская гавань» гэһэн дэбисхэр дээрэ аяншалгын – бэеэ һамааруулгын комплекс бариха түсэбтэй. Энээниие бэелүүлхэ һанаанай хэлсээн Хитадай Шеньян хотодо анхан баталагдаһан байгаа. Энээнһээ гадна, хитадай инвесторнууд Улаан-Үдэдэ зам заршамуудай түб бариха һанаатайгаа мэдүүлэнхэй. Барилгын хаһа болзор тухай мэдээн дуулгагдаадүй.
Тэрэшэлэн, республика дотор Кабанскын аймагай Выдрино тосхондо Байгалай уһа амһарта руу юулхэ талаар үйлэдбэриин комплекс байгуулха түсэл бэелүүлэгдэжэ эхилэнхэй. Байгал далайн тунгалаг уһа Хитад руугаа худалдажа байха зорилготой эндэхи инвестор гэжэ Бээжэнэй уласхоорондын худалдаа наймаанай «Цзинь Бэй Юань» компани тодоронхой. Татагдаһан мүнгэнэй хэмжээн хамта дээрээ 1 млрд. түхэриг бүридүүлхэ юм ха.
