Республикын олзын хэрэг эрхилэгшэдэй эрхэнүүдые хамгаалагшын тушаалда Анатолий Дашиевые Арадай Хуралай депутадуудай үзэмжэдэ дахин дэбжүүлээн боложо магад. Иигэжэ республикын парламентын түрүүлэгшэ Матвей Гершевич хуралдаанайнгаа дүнгүүд тушаа пресс-конференци дээрэ хэлээ.
Анхан, сентябриин 25-да Арадай Хурал Анатолий Дашиевые бизнес-омбудсменэй тушаалда дэмжээгүй һэн гээд һануулая. Нюуса һунгалтын дүнгүүдээр тэрэ хүрэхэ дуу абаагүй бэлэй. 33 депутат “зүбшөөгөө”, харин 16-ниинь “буруушаагаа”, мүн хоёр һунгамал «бэеэ баряа» һэн. Дашиевые тушаалда баталхын тула хоёр лэ дуун дутаһан байгаа.
- Һунгалтамнай иимээр дүүрэхэ гэжэ бишье хараалаагүй байгааб. Би өөрөө Дашиевай түлөө дуугаа үгөө һэм, - гээд республикын парламентын спикер тэмдэглээ, - юуб гэхэдэ, Буряадай Толгойлогшын зууршалжа байгааша тэрэ хүн энэ тушаалда яһала таараха гэжэ тоолоноб. Удаадахи хуралдаанда Анатолий Дашиевай нэрэ дахин дэбжүүлэгдэхэ байха гээд һанананаб.
Энээнһээ гадуур, Дашиевай булигдахань депутадуудай үнгэрэгшэ хуралдаанда үсөөн байһанһаа һабагшатай байжа магад гээд Гершевич онсолхо юм. Тэрэ сессидэ 66 һунгамалай 56-ниинь хабаадаа һэн. Гэхэ зуура, буруушаагшад олзын хэрэг эрхилэгшын тушаалда дэбжүүлэгдэжэ байһан хүнэй программатай танилсажа үрдеэшьегүй байхадаа болохо гэжэ тэрэ һанамжална.
Новости на бурятском языке 29 октября 2014 г., 10:18
Заметили опечатку? Выделите ошибку и нажмите Ctrl+Enter.
Поделиться
Поделиться
Твитнуть
Отправить
Поделиться
Поделиться
Поделиться
Твитнуть
Отправить
Поделиться
