Буряадай Арадай Хурал оршон тойронхи байгаали хамгаалха программын зүйл болохо өөрын программа зохёохо тухай дурадхал оруулба

Арадай Хурал «Оршон тойронхи байгаали хамгаалха ба нөөсэ баялигуудыень гамтайгаар ашаглаха тухай» гүрэнэй программа дотор өөрын тусхай программа зохёое гэжэ Буряад Уласай правительствэдэ дурдхал оруулба. Экономическэ политикын, байгаалиин нөөсэ баялигуудые ашаглалгын ба оршон тойронхиие хамгаалгын хорооной түрүүлэгшын орлогшо Анатолий Кушнаревай октябриин 30-да дуулгаһаар, тус программа юрэнхы дээрээ үйлэдбэриин болон эд хэрэглэлгын үлөөдэһэнүүдые аша үрэтэйгөөр хэрэглэхые баадхаха жэшээтэй.

«Буряад Улас дотор үйлэдбэриин ба эд хэрэглэлгын үлөөдэһэнүүд тухай» 2010 оной республиканска хуулиин бэелүүлгые Арадай Хурал «бараг» гэжэ сэгнэһэн байна. Гэбэшье, правительствын абаһан хэмжээнүүд үшөөл дутуу гээд депутадууд тоолоно. Жэшээнь, үйлэдбэриһээ сугларһан үлөөдэһэ хоёрдохёо хэрэглэжэ буйлуулха хэрэгтэ олзын хэрэг эрхилэгшэдые улам эдэбхитэйгээр хабаадуулха шухала гээд һунгамалнууд нэн түрүүн һанамжална һэн.

- Жэлэй туршада республика дотор 60-аад сая тоонно үлдөөсэ сугларна,тэдэнэй 90 – ээд хубинь малтамал ашаглалгын хойшолон мүн. Гэхэ зуура, Зүүн Сибириин гүрэнэй технологиин ба хүтэлбэрилгын университедэй эрдэмтэдэй баримтануудай ёһоор, малтамал ашаглалгын хойшолонгуудһаа мүнөөнэй, хямдахан сэнтэй барилгын эд материал буйлуулан гаргахада ехэ таатай. Буряад уласта энэ хэрэгтэ анхарал огтолон хандуулагданагүй, - гэжэ Кушнарев тэмдэглэхэ юм.

Тэрэнэй хэлэһээр, байгаалиин баялигуудай айдхарай түргөөр хорожо байгаа сагта сугларжал байгааша үлдөөсэнүүдые дахяад хэрэглэхэ гээшэ амин шухала  болоод байна. «Тиимэһээ энэ талаар хуули дансануудые дары абажа шиидхэхэ гээшэ гүрэн түрыншье, нютагай өөрын хүтэлбэринүүдэйшье гол зорилгонуудай нэгэндэ тоологдохо ёһотой, - гээд депутат бодомжолно.