«Гүрэнэй гү, али муницпальна мэдэлэй газарнуудые түлбэригүйгөөр үмсэдэ үгэхэ тухай» хуулида заһалтануудай оруулагдаһые Арадай Хуралай депутат, Газарай асуудалнуудай, аграрна политикын ба эдлэгшэдэй дэлгүүрэй талаар хорооной түрүүлэгшэ Баир Гармаев тайлбарилба. Депутадай тэмдэглэһээр, «өөрын дураар эзэмдэгдэгдэһэн» газарнуудые ёһо соонь оруулха хэрэг ябажа захалаа. Үнинэй хүлеэгдэһэн данса саарһануудаа республикын мянга түмэн ажаһуугша одоошье абаха аргатай болобо. Энэ һанамжаяа тэрэ Ниитын палатын дүхэриг шэрээ дээрэ соностоһон «газар тухай хуулинууд үшөөл дутуу дундатай, абтаһан хэмжээнүүд хүсэд бэшэ» гэхэ мэтэ шүүмжэлгэнүүдтэ харюу болгон дуулгаа һэн.
Гармаевай хэлэһээр, хуулиин заһалтануудые шүүмжэлэгшэд өөһэдөө хүсэд тэрэнээ ойлгоогүй. “Бидэ, хуули зохёон абагшад, тохёолдоод байһан сагта тон лэ тэнсүү, мэргэн шиидхэбэри абаһандаа марганагүйбди. Абтаһан заһалтануудай ашаар дэмы хашуулһан зон байһан газараа ёһо руунь бүридхэлдэ оруулха одоошье эрхэтэй болоо. Газар эзэлжэ һуугаад, тэрэнэйнгээ түлөө бүхы түлбэринүүдые түлэжэл байтараа гэнтэ ойлгоходоо хуули хазагайруулагшадай тоодо орохо гээшэмнай хайшаа юм. Эд зөөри ба газар эдлэхы хүтэлбэрилгын талаар хорооной тоогоор 3780 хүн тиимээр гомдолдо ороһон байна”, - Гармаев тэмдэглээ.
Мэдээсэлэй «Восток-Телеинформ» агентствын анхан дуулгаһаар тэдэ заһалтанууд 2014 оной хоёр дугаар һарада абтаһан байгаа. Улаан-Үдэдэ үнинэй һууһан аад, зүгөөр газараа зүб мүрөөр бүридхэлдэ оруулаагүй зондо газарнууд миинтээр үгтэхэ болонхой. «СССР-эй үеын үмсын зөөри тухай» СССР-эй хуулиин 1990 ондо гарахаһаа урид газараа эзэлжэ һууһан эрхэтэн тэрэ заһалтануудай аша туһада хүртэхэ эрхэтэй. Суглуулха саарһанууд эндэ олон хэрэгтэй бэшэ: гэр тухай дэбтэр, һуури байра тухай бүридхэлэй гэршэлгэ, архивай дансанууд гү, али газарайнгаа налог түлэһэн гэжэ гэршэ гэхэ мэтэ. Энэ заһалтануудые хуулида оруулхын тула депутадууд яһала оролдоо.Илангаяа, прокуратуратай зүбшэлгэ хүндөөр гараа.
