Буряад Уласай соёлой сайд Соёлма Дагаева Орос Уласай юрэнхылэгшэ Владимир Путинай Оросой Холбоото Уласай Федеральна Суглаанда хандалгада тайлбари хээ. Тэрэнэй хэлэһэнэй ёһоор, хандалга соо соёлдо хабаатай нэгэ зүйлынь болбол 2025 онһоо “Земскэ соёлой ажалшан” гэһэн хүтэлбэри бэелүүлэгдэжэ эхилхэ. Тэрэ болбол “Земскэ эмшэн” болон “Земскэ багша” гэһэн хүтэлбэринүүдтэй адли түсэл болоно.
Владимир Путинай соносхоһоной ёһоор, хүдөө һуурин гү, али багахан хотонуудта нүүжэ ошоһон мэргэжэлтэдтэ 1 сая түхэриг түлэгдэхэ. Харин Алас Дурнын нютаг можонуудта, Донбасста - хоёр дахин ехэ мүнгэн, 2 сая түхэриг түлэгдэхэ. Буряад Уласта Алас Дурнын федеральна тойрогой нютаг можонуудай тоодо ородог һэн тула соёлой ажалшад энэ хүтэлбэреэр хоёр сая түхэриг “подъемные” абаха болоно.
Тэдхэмжэ абагшын лэ шиидхэбэреэр тус түлбэри гэр байра, унаа тээбэри худалдан абаха болон ондоо хэрэгтэ шэлжүүлжэ болохо гэжэ Соёлма Дагаева тэмдэглээ.
- Тэрэшэлэн “Земскэ соёлой ажалшан” гэһэн хүтэлбэриин хабаадагша ажалай хэлсээ хэһэн үдэрһөө хойшо табан жэлэй туршада ажалайнгаа уялга дүүргэхэ гэжэ уялга өөр дээрээ даажа абана. Манай уласта “Земскэ соёлой ажалшан” гэһэн хүтэлбэри бэлүүлхэ хэмжээн соо хэрэгтэй хүнүүдэй тоо табан жэлэй туршада 580 мэргэжэлтэд, тэрэ тоодо соёлой сүлөө сагай эмхи зургаануудай 292 мэргэжэлтэд, хүүгэдэй уралигай һургуулинуудай 117 мэргэжэлтэд, номой сангай 163 мэргэжэлтэд болон музейн 8 мэргэжэлтэд болоно, - гэжэ Дагаева тэмдэглээ.
Тэрэнэй хэлэһэнэй ёһоор, тус хүтэлбэри эхилхэдэ, ургаха мэргэжэлтэдтэй болохо, тэрэ тоодо мэргэжэлэй болбосоролой эмхи зургаануудай дүүргэгшэд, хоёр жэлэй бэелүүлхэ саг соо бии болохо гэжэ Восток-Телеинформ мэдээсэнэ.
