Эхэ орон шудалал. Хэшээл №4. Буряад ороной баатарнууд
Восток-Телеинформ гэһэн мэдээсэлэй албан Буряад орон тухай видео-хэшээлнүүдые харуулжа эхилнэ. Табан ролигууд соо Буряад орон хаана оршодог бэ, тэрэнэй талмай хэды бэ, хэд байдаг бэ, эдэ зон юу эрхилдэг бэ гэжэ буряад хэлээр хөөрэжэ үгэхэбди.
Эрдэм ухаан болон эдэй засаг, спорт болон уралиг хэр хүгжэнэ бэ гэжэ хэлэгдэхэ болоно. Академик Арнольд Кириллович Тулохоновой найруулгаар нара хараһан “Эхэ орон шудалал” гэһэн һураха номой удхаар энээхэн видео-хэшээлнүүд хэгдээ юм.
Буряад Уласай Засагай газарай дэмжэлгээр зохёогдоһон энэ түсэлэй гол зорилгонь болбол хүүгэд залуушуулые эсэгэ орондоо дуратайгаар хүмүүжүүлхэ, танин мэдэхын һонирхол түрүүлхэ, интернет сүлжээндэ Буряад орониие түгээн дэлгэрүүлхэ, буряад хэлэ үзэхэ болон тэгшэ мэдэхэ эрхэ нүхэсэл байгуулга мүн.
