Буряад Уласта Бэшүүр һууринай 300 жэлэй ойн баяр тэмдэглэхэ үдэртэ Хүүгэдэй уралигай һургуули баяр ёһолой оршондо нээгдээ. Шэнээр бариха тухай асуудалаар 2019 ондо Буряад Уласай Толгойлогшо Алексей Цыденовэй аймагта айлшалха үедэ нютагай хүнүүд тэрээндэ хандаһан байгаа.
“Хүдөө орон нютагуудые хүгжөөлгэ” гэһэн хүтэлбэриин хэмжээн соо энэ барилга болоо. Хоёр дабхар байшан 992 дүрб метр талмайтай, зуугаад хүнэй багтаамжатай. Федеральна болон нютаг ороной бюджедүүдһээ болон бюджедһөө гадуур мүнгэнһөө 118 сая түхэриг энэ барилгада һомологдоо. Һургуулида 102 хүнэй тоглолтын танхим, бүжэгэй танхим, наада табиха зунай талмай болон газаа наада тоглоомой талмай бии. Түгэлдэр хуурай, ородой арадай хүгжэмэй зэмсэгүүдэй, байгаалин зурагай болон гар урлалай байгаа классуудһаа гадна бүжэгэй, эстрадын дуунай, шабар шаазанай кружогууд нэмэгдээ юм. Хэшээлнүүдтэ 5-тайһаа 18 наһан болотор хүүгэдые, мүн баһа ехэшүүл ерэхэ аргатай.
Буряад Уласай Засагай газарай нэрэһээ һууринай ажаһуугшадые һууринай 300 жэлэй ойгоор болон шэнэ һургуулиин нээгдэһэн ушараар засагай газарай зампред Алдар Гулгенов баярай үгэнүүдые хэлээ.
Харин зампред Галсан Дареев иигэжэ тэмдэглээ, энэ хүтэлбэридэ Бэшүүрэй аймагта 250 сая түхэриг һомологдоо. Энэ мүнгэндэ уралигай шэнэ һургуули баригдаа, соёлой байшан, хүүгэдэй сэсэрлиг болон гурбан стадион, мүн баһа дүрбэн харгы заһабарилагдаха болоно.
