Мухар-Шэбэрэй аймагай Хүсөөтын дунда һургуулиин һурагша Эрдэм Бадмаев «Эдир Будамшуу» гэһэн хүүгэдэй уласхоорондын мүрысөөнэй Гран-придэ хүртэбэ. Хэмжээ ябуулга мүнөө жэл арбан долоодохиёо үнгэрбэ гэжэ Восток-Телеинформ мэдээсэнэ.
Мүрысөөнэй түгэсхэлэй шатада Монголһоо, Үбэр Байгалай хизаарһаа, Эрхүү можоһоо болон Буряад Уласһаа бүхыдөө 20 гаран эдир зүжэгшэд хабаадаа. Тэдэ буряадаар шүлэг уншаа, дуу дуулаа, ганса хүнэй хөөрөө дэлгээ. Тиигэжэ хүн бүхэнэйнь гүйсэдхэхэ шадабари, уран үгэ, хүгжэмэй абьяас, уран нугархай хүдэлэсэ, зүжэгшэнэй бэлиг, харагшадай анхарал татаха болон тайзан эзэлхэ шадабари хараада абтаа. Гадна уран зохёолой буряад хэлэнэй мэдэсэ шухала байгаа.
Нэгэдэхи һуури Үбэр Байгалай хизаарай Дулдаргын дунда һургуулиин һурагша болон Эрхүү можын Үбэсын Апполон Шадаевай нэрэмжэтэ интернат-һургуулиин түлөөлэгшэ хубаагаа. Хоёрдохи һуурида Хэжэнгын Хоца Намсараевай нэрэмжэтэ дунда һургуулиин һурагша болон Ахын аймагай Соном Дугаровай нэрэмжэтэ Бурунголой дунда һургуулиин шаби хүртөө. Гурбадахи һуури Монгол ороной хабаадагша эзэлээ.
Тус мүрысөө Оросой арадай зүжэгшэн Михаил Елбонов үүсхэһэн юм гэжэ онсо тэмдэглэлтэй. Заншалта ёһоороо, 7-һоо 17 хүрэтэр наһанай һургуулиин хүбүүд бэлиг шадабарияа туршадаг юм. Хэмжээ ябуулгын гол зорилго –буряад хэлэ сахин хүгжөөлгэ, хүүгэдые буряад уран зохёолдо, зүжэглэмэл зохёолдо, театрай урлалда дурлуулга, Буряадай театрай урлал дэлгэрүүлгэ болон уласай театрай элитэ ажал ябуулагшадай зохёохы замтай танилсуулга.
Буряад хэлэн «2021 - 2030 онуудта буряад хэлэ сахин хүгжөөлгэ» гэһэн улас түрын программын хэмжээндэ дэмжэгдэдэг ба дэлгэрүүлэгдэдэг гэжэ һануулая. Программые Буряад Уласай Болбосоролой болон эрдэм ухаанай яаман залан хүтэлдэг, гүйсэдхэгшэдэй нэгэн – яаманай Буряад хэлэ хүгжөөхэ талаар улас түрын түб.
