Буряадай һурагшад «Асториумой»«Эдир хэлэ шэнжэлэгшэ» гэһэн болбосоролой программада хабаадаха аргатай гэжэ уласай Болбосоролой болон эрдэм ухаанай яаман мэдээсээ.
Тус программа Буряадай угсаата соёлой болбосоролой эмхинүүдэй эблэлдэ ородог һургуулинуудай 7-8-дахи ангинуудай һурагшадта хараалагдана.
«Асториум» гэһэн хүүгэдэй ба залуушуулай бэлиг шадабари элирүүлгын, дэмжэлгын болон хүгжөөлгын нютаг можын түбэй дэргэдэхи шэглэлтэ халаанай хэлэнэй оршондо оруулха аргаар хүүгэдые зохёожо ба уншажа һургаха, һурагшадай бэлиг, шэнжэлхы ажалай дадал шадабари хүгжөөхэ, абаһан мэдэсэеэ бодото хэрэг дээрэ хэрэглэхэ байдал тогтоолго хадаа «Болбосорол» гэһэн үндэһэн түсэлэй «Үхибүүн бүхэнэй амжалта» гэһэн холбоото уласай түсэлэй зорилгонуудта зохистой гэжэ Буряадай Болбосоролой болон эрдэм ухаанай яаман мэдээсээ.
Хабаадаха тухай мэдүүлгэнүүдээ 2022 оной октябриин 10 болотор [email protected] гэһэн сахим хаягаар «Асториум» гэһэн тэмдэгтэйгээр эльгээхэ хэрэгтэй. Мэдүүлгэ соохалаанда хабаадагшын обог, нэрэ, алдар, һургуули, аймаг заагдаха ёһотой. Гадна портфолио болон буряад хэлэн ба уран зохёолой талаар тодорхой туйлалтануудай баримтануудтай онлайн-мэдүүлгэ2022 оной октябриин 15 болотор https://astorium03.ru гэһэн сайт дээрэ «Образовательные программы» - «Наука» гэһэн гаршагтай хэсэгтэ табиха шухала.
Халаан 2022 оной октябриин 20-һоо 31 болотор үргэлжэлхэ. Уласай аймагуудһаа ерэһэн үхибүүд 2 ба 3 һууритай болбосон түхэлтэй зохид байранууд соо байрлаха, үдэрэй 5 дахин хооллохо.
- Бидэ «Эдир хэлэ шэнжэлэгшэ» гэһэн һуралсалаа эхилхэеэ, хабаадагшадтаяа танилсахаяа хүлеэжэ ядажа байнабди. Манай зорилго хадаа үхибүүдые өөрынь хүсөөр һуралсалай шиидхэгдээгүй асуудал оложо ба ойлгуулжа, һуралсалай зорилго элирхэйлжэ, түсэлэй сэдэб шэлэжэ, асуудал шиидхэхэ арга дурадхажа, эсэсэй дүн ойлгожо, дурадхагдаһан янзануудһаа зүбыень шэлэжэ, хэрэгтэй мэдээсэл бэдэржэ, шэнжэлжэ, үнэн зүбыень сэгнэжэ һургалга болоно. Тиин халаанай түгэсхэлдэ хүүгэд эндэ абаһан мэдэсэеэ хэрэглэжэ, үрэ дүнгүүдээ шэнжэлэн сэгнэжэ шадаха болохо ёһотой, - гэжэ «Асториум» гэһэн нютаг можын түбэй хүтэлбэрилэгшэ Зоя Баганникова онсолоо.
Һуралсал Түбэй мүнөө үеын оньһон түхеэрэлгэ ашаглалгатайгаар үнгэргэгдэдэг. Тиихэдэ мэдээжэ, нэрэ түрэтэй хүнүүд үхибүүдтэй хүдэлдэг. Жэшээнь, Буряад Уласай Болбосоролой болон эрдэм ухаанай яаманай Улас түрын «Бэлиг» түбэй бүридэлдэ байгуулһан Буряад хэлэ хүгжөөхэ талаар Улас түрын түбэй хүтэлбэрилэгшэ, энэ түбэй ахамад мэргэжэлтэн, Доржо Банзаровай нэрэмжэтэ Буряадай гүрэнэй ехэ һургуулиин буряад хэлэн ба зааха онол аргын тэнхимэй доцент, Буряад Уласай үндэһэтэнэй 1-дэхи лицей-интернадай буряад хэлэнэй багша һуралсал үнгэргэхэ.
