Буряадта мүнөө жэл Буряад хэлэнэй габшагай һарын хэмжээндэ буряад хэлэн ба соёлоор ойнлайн-олимпиада үнгэргэгдэхэ.
Тус хэмжээ ябуулгада Буряад Уласай, Усть-Ордын, Агын тойрогуудай һургуулинуудай 10-11-дэхи ангинуудай һурагшад болон дунда тусхай ба дээдэ һургуулинуудай оюутад хабаадаха.
- Мүнөө жэл олимпиада суута буряад эрдэмтэн Доржо Банзаровай түрэһөөр 200 жэлэй ойдо зорюулагдаха, - гэжэ БГУ-гай Зүүн зүгэй институдай Дээдэ һургуулида Восток-Телеинформгэһэн мэдээсэлэй агентствын сурбалжалагшада хэлээ. –Дүнгүүдынь октябриин 26-да согсологдохо. Мүнөө бүридхэлдэ абалгын ажал ябуулагдажа байна. Мүрысөөндэ манай гүрэнэй ямаршье нютаг можын һурагшад хабаадаха аргатай.
Уласта буряад хэлэ сахин хүгжөөлгэ Буряадай Болбосоролой болон эрдэм ухаанай яаманай зохёон бэлдэһэн «Буряад хэлэ сахин хүгжөөлгэ» гэһэн программын хэмжээндэ бэелүүлэгдэдэг юм гэжэ тэмдэглэхэ шухала. Программа 2030 он болотор болзортой. Программа гүйсэдхэгшэдэй нэгэн хадаа тус яаманай байгуулһан Буряад хэлэ хүгжөөхэ талаар Улас түрын түб болодог. Түб буряад хэлэ сахин хүгжөөлгэдэ, дэлгэрүүлгэдэ шэглүүлэгдэһэн олимпиадануудые, мүрысөөнүүдые болон бусад хэмжээ ябуулгануудые өөрөө эмхидхэн үнгэргэхэһөө гадна бусадта заабари зүбшэлэй туһа үзүүлдэг.
Үнгэрһэн зун уластамнай эхин ангинуудай һурагшадта буряад хэлээр «Хараасгай» гэһэн онлайн-олимпиада эмхидхэгдээ һэн. Хэмжээ ябуулгада 2-4-дэхи ангинуудай 700 гаран һурагшад – Олимпиадын һургуулиин шатын илагшад онлайн аргаар хабаадаа. Олимпиадын уласай шатын даабаринууд буряад хэлэнэй бэшэгэй дүримэй мэдэсэ элирүүлгэдэ шэглүүлэгдээ.
- Олимпиадын гол зорилго хадаа буряад хэлэндэ хүүгэдэй һонирхол дээшэлүүлгэ, бэрхэ үхибүүдые элирүүлгэ ба урмашуулга болоно, - гэжэ Буряадай Болбосоролой болон эрдэм ухаанай яаманда хэлээ.
