Буряад Уласта “Уран зохёолой зохёохы ажал. Сэтгүүл зүй. Оршуулга хэлгэ” гэһэн болбосоролой талаар мэргэжэлэй хоёрдугаар хүтэлбэри боложо үнгэрөө. Энэ арга хэмжээн “Асториум” гэһэн хүүгэдэй болон залуушуулай бэлиг шадабари элирүүлхэ, дэмжэхэ, хүгжөөхэ талаар нютаг можын түбэй дэргэдэ зохёон байгуулагдаа.
Буряад Уласай Болбосоролой болон эрдэм ухаанай яаманда мэдээсэһэнэй ёһоор, “Асториум” нютаг можын түб болбол “Болбосорол” гэһэн үндэһэн түсэлэй “Хүүгэд бүхэнэй амжалта” гэһэн федеральна түсэлэй хүреэндэ нээгдээ һэн. Энэ халаанда Баргажан, Зэдэ, Ивалга, Хэжэнгэ, Хурамхаан, Хяагта аймагуудай һургуулинуудай болон Буряадай уласай үндэһэтэнэй 1 дүгээр лицей-интернадай 9-10 дугаар ангиин һурагшад болохо 15 хүүгэд оролсоо.
Лекцинүүдтэ болон практическа хэшээлнүүдтэ буряад хэлээр интенсивнэ хэшээлнүүдэй аргаар хэшээл абагшад сэтгүүл зүйн болон уран үгын зохёохы ажалай, оршуулга хэлгынонсолиг тухай, тэрэнэй мотив, зорилго болон үрэ дүн тухай теориин мэдэсэ абаа.
- Хүтэлбэри ехэ һонирхолтой ба ашаг үрэтэйгөөр үнгэрөө. Хэшээлһээ гадуур саг соо хүүгэдтэ соёлой, танин мэдэхын хүтэлбэринүүд: наадан, тренинг, викторина болон хүгжэмэй хэшээлнүүд бэлдэгдэһэн байгаа. ИМБТ СО РАН-ай дорнодахинай гар бэшэмэл болон судар бэшэгүүдэй үзэсхэлэндэ, буряад театрта “Би-Толганай” зүжэг харалгада, дууриин болон баледэй театрта “Ангара дангина” баледтэ, угсаатанай зүйн музейдэ болон трамвайн деподоошолго болоо. “Буряад хэлэн дээрэ аялалай трамвайхан” гэһэн заншалта түсэл болоо, тэндэ хүүгэд буряад хэлэн дээрэ Улаан-Үдэ хотын түүхэтэй танилсаа, - гэжэ “Бэлиг” уласай түбтэ хөөрэнэ.
Энээхэн хүтэлбэриин зорилго болбол буряад хэлэ бэшэгэй талаар бэлигтэй һурагшадые дэмжэлгэдэ болон хүгжөөлгэдэ шэглүүлэгдэһэн эрхэ нүхэсэлнүүдые байгуулга, хэлэнэй оршондо һурагшадые оруулха аргаар тэдэнэй хэлэлгэ хүгжөөлгэ болоно гэжэ һануулая.
Удаадахи хүтэлбэри 2022 оной октябрь соо түсэблэгдэнэ.
