Улаан-Үдэдэ ехэ мүнгэнэй заһабарилгын һүүлээр “Хотын эмнэлгын газар № 4” гэһэн ГБУЗ нээгдээ. Буряад Уласай Толгойлогшо Алексей Цыденовэй, Буряад Уласай Арадай Хуралай һунгамалнууд Игорь Марковец, Леонид Белых гэгшэдэй наказуудые дүүргэхэ ажалнуудай хэмжээн соо уласай бюджедһөө мүнгэн эндэ һомологдоһон байна.
- Буряад Уласай һунгамалнуудай нэрэһээ эндэхи ажаһуугшадые болон “Хотын эмнэлгын газар №4” гэһэн гүрэнэй бюджетнэ элүүрые хамгаалгын эмхи зургаанай ажалшадые энэ поликлиникын нюур талын заһабариин ажалнуудай дүүргэгдэһэнэй баяр хүргэнэб. Танай ажалшадай мүнөөдэрэй ажалай амжалтанууд болбол эмнэлгын ажалшадай олон үеын ажалай үрэ дүн болоно. Поликлиникын һайхан шарай ба мүнөө сагайхяар
бүтээгдэһэн нюур талань архитектурын талаар мүнөөнэй загбартай нэгэ адли ябажа байһые харуулна бшуу, - гэжэ Ниигэмэй халамжын талаар хорооной түрүүлэгшэ Игорь Марковец тэмдэглээ.
Эмнэлгын газарай эд хэрэгсэлэй-техникын бааза жэл бүхэндэ һайжаруулагдана, эмнэлгын шэнэ тоног түхеэрэмжэнүүдээр тоногжуулалта хэгдэнэ, оньһото мэдээсэлэй технологинууд хүгжэнэ, эмнэлгын туһаламжа хүргэхэ шэнэ арга зүй нэбтэрүүлэгдэнэ гэжэ парламентын гэшүүн тэмдэглээ.
- Би Машзаводой уугуул хүн гээшэб. Би эндэ 55 жэл соо ажаһуунаб. Бүхы ажаһуугшадта энэ ехэ шухала үйлэ хэрэг болоно. Толгойлогшо Алексей Самбуевичай дэмжэлгээр, поликлиника гоё болоо. Ерээдүйн саг руу этигэл найдабаритайгаар шэртэн байнабди, яһала ехэ түсэбүүд табигдана. Манай ажаһуугшадай амидарал аятай зохид, һайн болохо ёһотой, - гэжэ Игорь Марковец нэмэжэ хэлээ.
Леонид Белых энэ поликлиника бариһан ветерануудта ехэ баяраа мэдүүлээ юм.
