Арадай Хуралай hунгамалнуудhаа Семашкын нэрэмжэтэ Уласай клиническэ больницын ковид аргалдаг таhагуудта угаадаг автомат-машинанууд ба сотово телефонууд дамжуулагдаба.
Эмшэлгэдэ угаалай машина юундээшье хэрэгтэй юм бэ гэжэ hанахаар. Харин мүнөө сагта нэгэ халаанда аяар 40 зон ороно. Эмшэдэй бэе аршалха бүхы хубсаhа нэгэ доро саашань абажа, дэбтээхэ, угааха, хатааха хэрэгтэй болоод байна. Байhан техникэ угаалай ехэ хэмжээ биранагүй. Мүнөө сагта манай бүридэлдэ дүрбэн hалбаринууд ороно. Тэдэ COVID-19 диагнозтай үбшэнтэнөөр хүдэлнэ. Мүнөө манай отделенинууд соо энэ диагнозтай 445 үбшэнтэн арга абажа байна. Тэдэнэй дунда хүндөөр үбдэhэн зоншье бии. Бүхы персонал хүдэлнэ: эмшэд, медсестранууд, санитарнууд. 380 ажалшад эмшэлгэдэ, үбшэнтэнэй харууhанда туhа хүргэнэ. «Улаан бүhэлүүр» соо ороходоо эмшэд түрүүшээр нэгэ бага ядалдана, мэгдэнэ, юундэб гэхэдэ тэндэ эмшэд тусхай стационарна телефондо холбоотой бэшэ. Эмшэдээрээ түргэн холболдожо, зүбшэн хэлсэжэ, шиидхэбэри абахын тула сотово телефонууд ехэ хэрэгтэй. Энэ хүндэ сагта бидэндэ туhалжа байhан hунгамалнуудтаа бидэ ехэ баяраа хүргэнэбди. Энэ ехэ хэрэгтэй туhаламжа, - гэжэ эмхи зургаанай ахамад врач Игорь Шпак тэмдэглэбэ.
Мүнөө бүхы Арадай Хуралай hунгамалнууд, хүн бүхэниинь, арга шадалаара өөhэдынгөө округ дээрэ туhаламжа хүргэнэ. Уласай больницада угаадаг машина ба сотово телефонуудые мүнгэ суглуулжа абаха уряал олонхиниинь дэмжээ.
