Буряад Улас федеральна бюджедһээ 5,4 сая түхэриг земскэ һоригшодые дэмжэжэ, 50 мянга хүрэтэр ажаһуугшадтай нютагуудта хүдэлхэ юм. Энээн тухай захиралтада 2025 оной октябриин 15-да Ородой Холбоото Уласай Засагай газарай Түрүүлэгшэ Михаил Мишустин гараа табиһан байна. Удааншьегүй энэ мүнгэн уласта ерэхээр хүлеэгдэнэ.
Буряад Уласай засагай газарай мэдээсэһээр, Түбэй болон Алас Дурнын федеральна тойрогуудта «Земскэ тренер» гэһэн программа байгша ондо эхилжэ, 2026 он болотор бүхы гүрэн дотор үргэдхэгдэхэ юм. 2025 ондо Буряад Уласай засаг зургаан багахан хотонуудаар гурбан тренер, 2028 он болотор үшөө 45 тренер эльгээхэ түсэбтэй.
Мүнөө Буряадай нютагуудта үшөө олон мэргэжэлтэ һоригшод хүдэлжэ, үхибүүдые бага наһанһаань тамирай бэлигтэй болгохо, томошуулда эдэбхитэй ажабайдал, элүүр энхые сахиха арга олгоно гэжэ Буряад Уласай Толгойлогшо Алексей Цыденов тэмдэглэнэ.
«Земский тренер» гэһэн программада мэдүүлгэнүүд мүнөө абтана. Аймаг руу нүүжэ, табан жэлэй туршада тэндэ хүдэлхэ хүсэлтэй мэргэжэлтэд 2 сая түхэригэй нэгэ удаагай түлбэридэ хүртэхэ юм.
