Буряад Уласай толгойлогшо Алексей Цыденов ноябриин 4-дэ Мухар-Шэбэр аймаг тусхай зорилготойгоор ошобо. Бар һууринда спортын талмайн ба Сагаан Нуур һууринда футболой поли нээлгэнэй баяр ёһололдо хабаадаа,- гэжэ Засагай газарай хэблэлэй албанhаа Восток-Телеинформ дуулгана.
- Мүнөөдэр бидэ спортын шэнэ объектнүүдые харабабди. Бар һууринда тамирай талмай һургуулиин талмай дээрэ байбашье һаа, бүхы нютагай зон эндэ орожэ бэеэ hорихо аргатай. Һайн шанарай хушалтатай ба зайн галаар гэрэлтүүлэгдэhэн футболой поли ашаглалда тушаагдаа , эндэшье бүхы хүнүүд наадаха. Эдэ бүхы арад зондо зорюулагдана , «Спорт – ажамидаралай ёhо журам” гэһэн түсэлөөр “Демография” гэһэн юрэнхылэгшын үндэһэн түсэлөөр бүтээгдөө. Спорт гээшэ үнэн дээрээ ажамидаралай нормо болохо ёһотой, - гэжэ Алексей Цыденов хэлээ.
Бар нютагта хэмэл хушалтатай тамирай талмай 4,2 сая түхэригтэ баригдаа. 16 метр үргэнтэй, утаашаа 40 метр талмай залгалаагүй хэмэл хушалтатай, тиимэhээ унахадаашье хүн гэмэлтэхэгүй. Энэ дэбисхэр хоёр хубида хубаагданхай: волейбол, баскетбол, теннис наадаха зоно ба тренажёрнуудай зоно. Түмэр хаалта баригданхай, диодно гэрэлтэй фонарьнууд бодхоогдонхой, тиимэhээ зон үдэшэ орой болотор бэеэ hорихо аргатай болоно.
Сагаан Нуурта «Угольщик» гэhэн бэеын тамирай ба элүүржүүлгын комплексай хажууда 84*62 метр талмайтай футболой поли баhа «Демография» гэһэн үндэһэн түсэлэй хэмжээндэ баригдаа. Энэ поли CombiGrass гэжэ тусхай хэмэл хушалтатай. Энэ бүхы түсэлэй сэн 14,9 миллион түхэригэй болоо. Холбоото уласай бюджетhөө - 8,4 миллион түхэриг, хахад миллион - уласай бюджетhөө, зургаан миллион түхэриг «Разрез Тугнуйский» гэжэ хуби ниилүүлhэн бүлгэмhөө эльгээгдээ.
