Залуу эрдэмтэдые дэмжэхэ талаар грантын тусхай жаса байгуулха тухай дурадхал Буряад Уласай толгойлогшодо дамжуулха гэһэн зүйл Арадай Хуралай уншалгануудай дүнгүүдээр абтаһан резолюци согсолго дотор оруулагдаа. Буряадай Эрдэмэй Түбэй залуу эрдэмтэдэй Зүблэлэй түрүүлэгшэ Евгений Нолевай тэмдэглэһээр, мүнгэ һомолходоо гүрэнэй захил доро тэрэнээ зорюулха шухала.
- Тиимэ жаса байгуулха гээ һаа, залуу эрдэмтэдэй ямар нэгэ һанамжа бодол ганса хангаха бэшэ, зүгөөр нютаг оронойнгоо хүгжэлтэдэ шухала хэрэг бэелүүлхые хараада абаха хэрэгтэй, - гээд Нолев тэмдэглэнэ – Мүнгэ дамжуулагша эндэ улас туүрын урда байһан амин шухала бэрхэшээлнүүдые бүридхэхэ жэшээтэй.
Мүнөө байгаа гол жасанууд гүрэн холбооной хэмжээндэ байгуулагданхай. Тэдэ жасануудта Буряад ороной тала хараада балай абтаагүй. Гэхэ зуура, нютаг можын зэргэтэй жасанууд Саха-Яхадта, Башкортостанда, Кемеровын, Москвагай, Свердловскын можонуудта нээгдэнхэй. Тиин тэдэ жасануудайнь хэмжээн юрэнхы дээрээ 20-40 сая түхэриг бүридүүлдэг байна. Буряад уласта энэ сагта эгээл ехэ жаса оройдоол 3 саяда хүрэнэ – энэнь Зүүн Сибириин гүрэнэй хүтэлбэриин, технологиин университедтэ хамаатай, жаса бүхэниинь тэндэ 200 мянган түхэриг болодог.
- Гэхэтэй хамта, манай эндэ өөрын һонирхолтой, өөрсэ удхатай һанамжануудтай хоёр мянган залуу эрдэмтэд бии. Бидэ залуушуулые дэмжэхыень иимэ дурадхалтайгаар Толгойлогшодо, Засагай Газарта хандаа һэмди, - гэжэ эрдэмтэн хэлээ.
