Буряад Уласта түүхэтэ Үдэнгын наймаанай харгыда хүүргэ заһабарилагдаа. Темник гол дээгүүрхи хүүргэ Үдэнгэ тосхон шадар нютагай харгыда оршодог. Энэнь ганса нютагайхидые эхэ газартай холбодог бэшэ, харин можын эгээл томо ажахынуудай нэгэнэй газарнуудта орохо арга олгоно.
Заһабарилгын ажал гурбан жэлэй туршада үнгэрөө. Буряадай харгын жасаһаа 260 гаран сая түхэриг һомологдоо гэжэ уласай хүтэлбэрилэгшэ Алексей Цыденов социальна холбоон соо мэдээсэбэ.
Энэ хүүргэ Үдэнгын наймаанай харгыда, Сайны ехэ харгын нэгэ хэһэгтэ оршодог. 1884 ондо баригдаһан энэ зам Хяагтаһаа Байгал нуур хүрэтэр Сэлэндүүмэ, Хамар-Дабан хада уулануудаар, Мысовая сэхэ гарадаг һэн. Түүхынгээ туршада энэ хүүргэ голой һүрөөтэй гүйдэлөөр дүрбэ дахин абтажа, нэгэ удаа галда ороһон байна. Заһабарилгын урда тээ нютагай ажаһуугшад тэрэнээ гаталхаяа болгоомжотой байгаа.
"Заримдаа, үглөөгүүр ябажа ябахадаа, хашаа дээгүүр уһан шудхадаг тула, һөөргөө гаталха гү гэжэ мэдэдэггүй байгаабди. Маанадта хүүргэ бариха нөөсэ оложо үгэһэндэтнай баяртай байнабди", - гэжэ Үдэнга нютагай ажаһуугша Гармажап Бургутова хөөрэбэ.
Сэлэнгын аймагай засаг дарга Станислав Гармаевай тэмдэглэһээр, шэнэ хүүргэ бүхы стандартнуудаар баригдаа: табан пролет, 4,5 метр утатай нэгэ зуруудтай харгы, тротуарнууд бии. Хүүргын бүхы ута 91 метр болоно.
Ородой Холбоото Уласай Юрэнхылэгшэ Владимир Путинай заабаряар Буряад Уласта бэелүүлэгдэжэ байһан «Ажабайдалай инфраструктура» гэһэн үндэһэтэнэй түсэлөөр энэ жэлдэ дүн хамта 21 хүүргэ дүүргэгдэхэ түсэбтэй.
