Агростартапай 2025 ондо бүхы 18 грантнуудые СВО-до хабаадагшад абаха болоһон байна гэжэ Буряад Уласай толгойлогшо Алексей Цыденов засагай газарай 2024 оной ажал тухай элидхэл соогоо хэлэбэ.
Энэ грант бага олзын хэрэг эрхилэлгэ хүгжөөхэ бусад грантнуудтай хамта, регион дотор засагай газарай дэмжэлгын эгээл дэлгэрэнгы хэмжээнүүдэй нэгэн болоно. 2024 ондо 30 грант үгтөө, тэрэ тоодо: Агростартап шэглэлээр – 23 грант, тэдэнэй 3 Агростартап грант СВО-до хабаадагшад абаа, 6 грант «Гэр бүлын ажахы хүгжөөлгэ», 1 грант «СПОК-ой материально-техническэ бааза хүгжөөлгэ» гэһэн шэглэлээр. Бүхыдөө 2019-2024 онуудта 197 грант үгтөө.
Урда жэлнүүдэй грантнуудые ашаглажа, 2024 ондо Бэшүүрэй аймагта һүнэй 1 фермэ, Түнхэнэй аймагта модульна мяханай цех баригдажа, ашаглалгада тушаагдаа, Сэлэнгын аймагай “Бүхэнэй” хүдөө ажахын үйлэдбэриин комплексдо огородой эдеэ хадагалдаг газарай капитальна заһабарилга хэгдээ, ажахынуудай материал болон техническэ база шэнэлэгдээ. 2024 ондо гэр бүлын фермэнүүдтэ гүрэнэй дэмжэлгын шэнэ түхэл бии болоо – хүдөө ажахын зүйлнүүдые үйлэдбэрилхэ, хадагалха, болбосоруулха зорилготой объектнүүдые дүүргэхэ, үхэр мал, хүдөө ажахын техникэ болон тоног түхеэрэмжэ худалдан абахада шэглүүлэгдэһэн гаргашануудай зарим хубиие хүсэлдүүлгэдэ үгтөө.
