Буряад Уласай хойто зүгтэ хоёр аэропорт гуримда оруулагдаха. Нижнеангарск болон Таксимо хотын байгуулгануудые шэнэлхэ талаар ажал Буряад Уласта “Ашаг үрэтэй унаа тээбэриин байгуулга” гэһэн үндэһэнэй гүрэнэй түсэлэй хэмжээндэ түсэблэгдэнхэй. 5 миллиард түхэриг эдэ зорилгонуудта хараалагдаа.
Буряад Уласай Тээбэриин болон хэлхеэ холбооной яаманай дуулгаһаар, ниидэхэ замуудые федеральна мэдэлһээ уласай мэдэлдэ дамжуулха ажал мүнөө ябуулагдажа байна, энэнь түсэлдэ хабаадаха заатагүй ушар болоно. Энэ ажал дүүргээд, мэргэжэлтэд түсэлэй бэшэг баримтануудые бэлдэжэ эхилхэ, тиигэбэл барилгын ажал эхилхэ аргатай болохо. Тэдэниие 2027 ондо эхилхэ түсэбтэй. Буряад Уласай тээбэриин, элшэ хүсэнэй болон харгын байгууламжа хүгжэлтын сайд Александр Гоге аэропортнуудые шэнэдхэхэдэ, ажаһуугшадта тээбэриин хангалгын шанар һайжаржа, регионой инфраструктура һайжаржа, аяншалагшад болон олзын хэрэг эрхилэгшэдтэ һонирхолтой болохо гэжэ тэмдэглэбэ.
Гадна үндэһэтэнэй түсэлэй хэмжээндэ Улаан-Үдэ хотодо «Байгал» гэһэн уласхоорондын аэропортын перрон һэльбэн шэнэдхэлгэ мүн лэ түсэблэгдэнхэй. Жэл бүри 15-20 мянган хүнөөр зорчигшодой ябаса олошоржо, агаарай самолёдуудые зогсоохо талмайе ехэ болгохо хэрэгтэй болоһонһоо болоно. Энэ түсэлэй бэелүүлгэ гүрэнэй-хубиин түншэлгын механизмаар бэелүүлэгдэхэ юм. Үнгэрһэн жэлэй ноябрь һарада Улаан-Үдэ хотын «Байгал» аэропортын мүнөө үеын аэропортын комплекс баяр ёһололой ёһоор нээгдээ һэн гээд һануулая.
