Арадай Хуралай hунгамалнууд парламентын хүтэлбэрилэгшэ Владимир Павловай ударидалга доро Кабанскын ба Прибайкалиин аймаг ажалай хэрэгээр гараба. Энэ хэрэгээр ябалгын зорилго хүдөө ажахыда, илангаяа, хартаабха болон овощ ургуулдаг «Гарантия-2» компаниин ажалай жэшээ дээрэ, гүрэнэй туhаламжын уласай хуулиин бэелүүлгэтэй танилсалга болоно, -гэжэ Восток-Телеинформ бэшэнэ. Түрүүшын зогсолто Быково нютагай хажууда. Эндэ трактор болон уhалалгын түхеэрэлгын туhаар хартаабха тарилга хэгдэнэ.
- Хуурай, ганданги манай Буряад нютагай уларил соо уhалбаригүйгөөр ба уhалууриин hужаагүйгөөр овощ тарилгын ажал хэхэнь аргагүй, - гэжэ ударидахы хүтэлбэрилэгшэ Елена Пашинская тэмдэглээ. – Нёдондо бидэ 11800 тонна хартаабха, 4611 тонна морхооб, свёкло ба капуста ургуулаабди. Энэ жэлдэ тарилгын газараа ехэ болгожо, 410 гектар хартаабхада, 31 гектар морхообто, 50 гектар свёкло ба капуста тарилгада бэлдээбди. Намартаа манай ургуулhан овощнууд ганса Улаан-Yдын наймаанай газарнуудта бэшэ, харин хүршэ можонуудта наймаанда гараха.
Овощ тарилгын хажуугаар «Гарантия-2» үрhэ хүрэнгэ эрхилдэг. Голландиин ба франциин селекциин үрhэ хүрэнгэ худалдажа абана. Энэ хүдөө ажахын хэрэг эрхилдэг үйлэдбэриин зургаанай түсэб соо - тарилгын талмай 6 мянган гектар хүрэтэр ехэ болгохо ба 20 мянган тонна: 12 мянган тонна хартаабха ба 8 мянган тонна капуста, свекла, морхооб багтааха овощ хадагалха байра барилга.
- Уласай урда ехэ шухала зорилго табигдана – арад зоноо өөрын үйлэдбэриин эдеэ хоолоор хангалга, - гэжэ Арадай Хуралай спикер Владимир Павлов онсо тэмдэглэбэ. – Энээнhээ хүн зоной бэеын элүүр энхэ байдал дулдына. Зон нютагайнгаа дэбисхэр дээрэ уграhан эдеэ хоол абажа эдихэдэ бэе махабадта hайн гэжэ мэдэрхэ ёhотой. Мүнөө сагта Буряад Уластамнай өөрын мяхаар хангалга 50 %. Һүөөр хангалга – 55%, овощнуудаар -50%, харин хартаабхаар 95% хангагдана. Yшөө 15 жэлэй саана өөрын ургуулhан овощ ба хартаабха дуталдадаг байгаа. «Гарантия-2» энэ хэрэг гартаа абажа, гүрэнэй туhаламжын хүсөөр hайн дүн харуулна. Овощ хадагалха шэнэ байра барилгын проект ехэ hайн хэрэг. Шэнэ ажалай hууринуудшье гараха. Энэ проектдо мүнгэ hомололго ехэ үрэ дүнтэй хэрэг, ганса олзын талаhаа бэшэ, харин hайн шанартай овощнуудаар хангалга гээшэ.
