Жэлэй эхинһээ 4588 хүн үнөөхи порталай ашаар засагай зургаануудай ажал оролдогын шанар шэнжые сэгнэһэн байна. Юрэнхыдөө, тэрэ портал дээрэ 7700 гаран хүн бүридхэлдэ оронхой, тэдэнһээ гэр байрын, харгы замай ажахынуудай, ниитын тээбэриин болон элүүрые хамгаалгын талаар асуудалнуудаар дүн хамта 280 гаран мэдээсэл ороо.
- Портал дээрэ хамта дээрэ 240 мэдээгээр тайлбарилганууд үгтөө, мүн зарим тэды бэрхэшээлнүүдш шиидхэгдээ, тэрэ тоодо: «Харгы замай ажахы» – 116, «Гэр байрын ажахы» – 93, «Ниитын тээбэри» - 23, «Элүүрые хамгаалга» - 8 гэхэ мэтын хэһэгүүдтэ бүридхэгдэһэн мэдээсэлнүүдтэ харюу үгтэһэн байна, - гээд засагай газарта тэмдэглэгдэнэ.
Тиин абахада, «Аша үрые сэгнэлтэ» гэжэ хэһэгтэнь ажаһуугшад улас түрын зиндаагай болоод нютагай өөрын хүтэлбэриин зургаануудай ажаябуулгануудай хэр аша туһатайе сэгнэжэ байха аргатай. Портал нюур танюуһатай, тиимэһээ спам-тарааха, хүнэй дуунуудые үсхэн олошоруулха мэтын харша хэрэгүүдые үйлэдхэхын аргагүй.
Гадна, гүрэн түрын эдэбхи үүсхэлнүүдые эрхэтэ зонойнгоо дэмжэжэ гү, али буруушаажа байһые асуужа мэдэхэ арга олгуулна. Жэшээнь, энэ жэлэ июлиин 24-һөө сентябриин 17 болотор уласай байра байдал хүгжөөхэ асуудалнууд зоной анхаралда табигдаа һэн. Асуултын дүнгүүд 2035 он болотор хараатай Түсэб зохëолгондо хэрэглэгдээ.
«Эдэбхитэй эрхэтэн» гэһэн портал уласай толгойлогшын үүсхэлээр байгуулагдажа, нëдондоной ноябриин 1-һээ ажалаа ябуулжа захалаа бэлэй гээд һануулая. Улад зонойнгоо һанаа бодол хараадаа абан, ажалаа ябуулжа байха зорилгоһоо тэрэ һабагшатай гээд ойлгосотой. Засаг зургаануудай ажал хэрэгүүдые хинажа сэгнэжэ байха гэбэл, www.gosuslugi.ru гэһэн хаягаар тэрэ портал дээрэ тусхай заабаринуудай ашаар бүридхэлдэ орожо болоно.
