Холбоото уласай Алас Дурнын тойрогой хуралдаанда хабаадахынь тула буряад хэлэнэй залуу багшанарай бүлэг Буряадта суглуулна. Түрэлхи хэлэн ба уран зохёолой залуу багшанарай хуралдаа Оросой Холбоото Уласай Түрэлхи хэлэнүүдэй дээдэ һургуули эмхидхэнэ.
Буряад Уласай Болбосоролой болон эрдэм ухаанай яаманай Буряад хэлэ хүгжөөхэ талаар Улас түрын түбэй мэргэжэлтэдэй Восток-Телеинформдо дуулгаһаар, энэ хэмжээ ябуулга сентябриин 22-23-да Хабаровск хотодо үнгэргэгдэхэ. Буряад орониие түрэлхи хэлэнэй 15 багша түлөөлхэ юм.
- Мүнөө хабаадагшадые суглуулжа байнабди. Ехэнхидээ аймагуудайнгаа багшанарые бүлэгтэ оруулхаар түсэблэнхэйбди, - гэжэ түбэйхид тэмдэглээ.
Даб дээрээ мэдүүлгэнүүдые тушаан абалга үргэлжэлһөөр. Сентябриин эхиндэ бүлэг бүридхэгдэхөөр хараалагдана.
Хэмжээ ябуулга түрэлхи хэлэн ба уран зохёолой залуу багшанарай мэргэжэлтэ шадабари, зохёохы болон оюун ухаанай арга шадал хүгжөөлгэдэ; залуу багшанарай мэргэжэлэй зэргэ ба нэрэ хүндэ дээшэлүүлгэдэ; багшын мэргэжэлдэ, түрэлхи хэлэнэй ба уран зохёолой залуу багшанарай бэрхэшээлнүүдтэ олониитын анхарал таталгада шэглүүлэгдэнэ гэжэ онсо тэмдэглэлтэй. Хуралдаанда хабаадахыень 35 хүрэтэр наһатай, 10 жэлһээ доошо хугасаада ажаллаһан түрэлхи хэлэн ба уран зохёолой залуу багшанарые; залуу багшанарай эблэлэй гэшүүдые (түрэлхи хэлэн ба уран зохёолой залуу багшанарые); залуу багшанарые залан һургагшадые; залуу багшанарай хүдэлдэг болбосоролой эмхинүүдэй хүтэлбэрилэгшэдые урина.
Хуралдаанай хэмжээндэ Оросой Холбоото Уласай түрэлхи хэлэн ба уран зохёолой залуу багшанарай мэргэжэлтэ нэгэдэл (Түрэлхи хэлэн ба уран зохёолой залуу багшанарай эблэл) байгуулхаар түсэблэгдэнэ. Мүн тиихэдэ түрэлхи хэлэн ба уран зохёолой залуу багшанарай ажалайнгаа талаар харилсаха, ажал ябуулгаяа суг түсэблэхэ талмай байгуулхаар; холбоото уласай онол аргын талмай дээрэ түрэлхи хэлэн ба уран зохёолой залуу багшанарай мэргэжэлтэ дүй дүршэлэй нөөсэ байгуулхаар хараалагдана. Гадна хуралдаанай дүнгүүдээр хабаадагшадай элидхэлнүүдэй сахим согсолбори бүтээгдэхэ юм.
