Июниин 23-һаа Буряад Уласай ТОС-уудай фестиваль захалхань. Байгша ондо тус урилдаан шэнэ түхэлөөр үнгэргэгдэнэ. Буряадай 6-аан аймагуудта хэдэн семинарнууд, эдэбхи ехэтэй зондо һуралсалнууд, аймагай засаг дарганарай хабаадалгатай түхэреэн шэрээнүүд үнгэргэгдэхэ. Үшөө тиихэдэ хабаадагшад уран һайханай урилдаануудта оролсожо, оюун бэлигээ олоной һонорто дурадхаха. Арадай уран бэлигэй дархашуул өөрынгөө бүтээлнүүдээрээ амяараа тэмсээндэ хабаадаха. ТОС-уудай фестивалиин гаршаг доро үнгэргэдэһэн бүхы хэмжээ ябуулгануудта, Буряад Уласай Толгойлогшо Алексей Самбуевич Цыденов хүрэжэ ерээд хабаадалсаха юм.
Тус наадан хоёр шатаһаа бүридэжэ үнгэрхэ. Түрүүшын шатань нэрлэгдэһэн 6-аан аймагай дэбисхэр дээрэ болохонь. Харин хоёрдохи шатань бүхы аймагуудай, Улаан-Үдэ хотын ТОС-уудай хабаадалгатайгаар, Буряад Уласай ниислэл Улаан-Үдэ хотодо үнгэргэгдэхэ юм. Нажарай һүүл һарын 11-дэ тус фестивалиин һүүлшын шата болоод, бүхыдөө хэмжээ ябуулга дүүрэхэ.
- Буряадай бүхы ТОС-уудай хабаадалгатай үргэн дэлисэтэй хэмжээн үнгэрхэ. Эртэ үглөөнһөө хотын түб талмай дээрэ баярай жагсаалда ТОС-уудай гэшүүд ябаха. Бүхэли үдэртөө яармаг ажалаа ябуулха. Аялга дуутай концерт наадаар ТОС-уудай фестиваль түгэсэхэ, - гэжэ эмхидхэгшэд дуулгана.
