Буряад хэлэнэй габшагай һарын хэмжээндэ уласай һурагшадай дунда «Табан хурган-2021» гэһэн заншалта мүрысөөн онлайн түхэлөөр эмхидхэгдээ. Хэмжээ ябуулга Хэжэнгын интернат-һургуулида долоодохиёо үнгэргэгдэбэ. Энэ жэл Буряад Уласай болон Эрхүү можын һургуулинуудай 120 һурагша хабаадаа гэжэ Восток-Телеинформ мэдээсэнэ.
Буряад хэлэн «2021 - 2030 онуудта буряад хэлэ сахин хүгжөөлгэ» гэһэн улас түрын программын хэмжээндэ дэмжэгдэдэг ба дэлгэрүүлэгдэдэг юм. Программые Буряад Уласай Болбосоролой болон эрдэм ухаанай яаман залан хүтэлдэг, гүйсэдхэгшэдэй нэгэн – яаманай Буряад хэлэ хүгжөөхэ талаар улас түрын түб.
Нааданда Буряад Уласые 10 һургуули түлөөлөө: Ахын аймагай Өөрлигэй дунда һургуули, Түнхэнэй аймагай Шэмхын интернат-һургуули, Захааминай аймагай Сахирай дунда һургуули, Зэдын аймагай Н.С. Сосоровой нэрэмжэтэ Цагаатын дунда һургуули, Загарайн аймагай Асагадай интернат-һургуули, Хэжэнгын аймагай Чисаанын дунда һургуули, Х. Намсараевай нэрэмжэтэ Хэжэнгын дунда һургуули, Б. Базароной нэрэмжэтэ Дээдэ Хэжэнгын дунда һургуули болон Хэжэнгын интернат-һургуули. Тиихэдэ Эрхүү можын Усть-Ордын интернат-гимназиин һурагшад эдэбхитэй хабаадаа.
- Үхибүүд иимэ хэмжээ ябуулгада хабаадахадаа, буряадаар дуугаржа һурахаһаа гадна түрэл хэлэн дээрээ бодомжолжо һурана. Мүн түрэл дайдынгаа байгаали, түүхэ мэдэхэ болоно, арадайнгаа ёһо заншал шудалжа, сахижа һурана, - гэжэ буряад хэлэнэй багша Лариса Абидуева тэмдэглээ.
«Табан хурган» мүрысөөн табан шатаһаа бүридөө. «Барбаадай» гэһэн шатада 11-дэхи ангиин һурагшад «Буряад хэлэмни – буряад гарбални» гэһэн уран найруулга бэшээ. «Батан туулай» - 9-10-дахи ангиинхид түрэл оронойнгоо ёһо заншал, байгаали, түүхэ мэдэсээр тестнүүдые дүүргээ. «Тоохон тобшо» - 7-8-дахи ангинуудай үхибүүд ород, буряад, монгол хэлэнүүд дээрэ оршуулга хээ. «Толи байса» - 5-6-дахи ангиин шабинар тоо бодолгоор буряад хэлэн дээрэ даабаринуудые дүүргээ. «Бишыхан шэгшүүдэй» - 3-4-дэхи ангинуудай багашуул буряад уран шүлэгшэдэй шүлэгүүдые сээжэлдээд, уран гоёор уншаа. Гурбан минутын видео буулгагдажа, ютуб-каналда табигдаа юм.
