Буряад Уласай Мухар-Шэбэрэй аймагта «Народный бюджет» гэжэ түсэлэй хэмжээн соогуур хүдөө нютагуудые болбосон түхэлтэй болголгын ажал үргэлжэлhөөр. Арад зоной ба hомоной захиргаануудай эдэбхитэй ажалай hайгаар олон шухала асуудалнууд шиидхэгдээ. Мухар-Шэбэрэй аймагай ажаhуугшад hунгалтын участогууд дээрээ Бүхэроссин Үндэһэн хуулида оруулагдаха заһалтануудай түлөө дуугаа үгэлгын үдэрнүүдтэ июлиин 1-hээ 7 болотор 27 объектнүүдые болбосон түхэлтэй болгохын түлөө дуугаа үгэhэн байна.
Энэ хэмжээ ябуулгануудта Холбоото Уласай бюджедhээ 6,9 миллион түхэриг мүнгэн тэдхэмжэ ажаhуугшадай тоогоор тааруулан хубаарилагдажа, hууринуудта тараагдаа. «Народный бюджет» гэжэ түсэлдэ хүүгэдэй талмайнуудые ба бэеэ hорилгын түхеэрэлгэнүүдые бариха, гудамжануудые зайн галаар гэрэлтүүлхэ, хүшөөнүүдые шэнэлхэ, бог шоройн контейнернүүдые тогтоохо, харгынуудые ба хүүргэнүүдые заhаха, буддын шажанай тахилай шэрээ бүтээхэ гэhэн түхеэрэлгэнүүдэй зууршалганууд ороhон байна. Мүнөө сагай байдалаар 10 hууринудта 14 хэмжээ ябуулганууд бэелүүлэгдэнхэй.
Тиигэжэ, элдэб дүүжэнэй түхеэрэлгэнүүдтэй хүүгэдэй түрүүшын талмай Бом нютагта «Народный бюджет» гэжэ түсэлэй hайгаар бии болобо. Энэ талмай hургуулиин газаа тогтоогоо. Мүнөө эхин агиин hурагшад ба хүүгэдэй сэсэрлигэй хүмүүжүүлэгшэд тэндэ ехэ баяртай наадана.
Владимир Путинай даабаряар энэ түсэл бэелүүлгэдэ 2020 оной майн 22-то Буряад Улас 300 миллион түхэригтэ хүртөө. Дуугаа народныйбюджет03.рф гэжэ сайт дээрэ хүн бүхэн өөрынгөө хэрэгтэй гэжэ hанаhан объектын түлөө дуугаа үгэхэ аргатай байгаа гэжэ hануулая.
