«Манай Буряад орон» гэһэн ехэ хурал дээрэ дүхэриг шэрээгэй үедэ 1149 дурадхалнууд, hанал бодолнууд, түһөө түсэбүүд оробо. Залуушуулай асуудалаар зон ехэ эдэбхитэйгээр хабаадаа. Эндэ 180 гаран асуудалнууд зүбшэн хэлсэгдээ, - гэжэ Буряад Уласай Толгойлогшын болон Засагай газарай Захиргааниие хүтэлэгшын орлогшо Ирина Смоляк хөөрэбэ.
Алексей Цыденов ниигэмэй талаар бүлгэмэй дурадхаһан дурадхалнуудтай, hанал бодолнуудтай ба түһөө түсэбүүдтэй февралиин 15-да танилсаба. Түһөө түсэбүүдэй дунда – халдабарита үбшэнhөө аргалдаг эмнэлгын газарнуудые барилга, физкультурын ба тамирай байшангуудые бодхоолго, тэрэнэй талмай дээрэ мүрысөөнүүдые үнгэргэлгэ, буряад хэлэндэ һураха, зааха онлайн-һургуули ба мүнөө үеын буряад искусствын түб нээлгэ дурадхагданхай байна. Хамта дээрэ 12 дүхэриг шэрээнүүдэй ажалай дүнгөөр мянга гаран дурадхалнууд ороһон байна.
Буряад Уласай Засагай газар спортын болон физкультурын танхим соо «Манай Буряад орон» гэжэ нэрэтэй нээмэл зүблөө февралиин 8-да үнгэргөө гэжэ һануулая. Энэ хэмжээ ябуулгада элдэб ондоо һалбариин экспертнүүд, ниитэ ажаябуулагшад, олзын хэрэг эрхилэгшэд, хүдөө аймагуудай түлөөлэгшэд, хотын айлшад ба ажаһуугшад хабаадаба.
Буряад Уласай толгойлогшо Алексей Цыденов ехэ хуралдаанайнгаа нээлгэ дээрэ уласнай яажа хүгжэнэб, 2020 ондо Алас Дурна зүгэй тойрогой бүридэлдэ манай региондо юун хүлеэгдэнэб гэжэ хэлээд, ажаһуугшадые эдэбхитэйгээр, нягта холбоотойгоор засаг баригшадтай харилсахыень уряалба.
