Арадай Хуралай ээлжээтэ сессидэ һунгамалнууд “Үншэн хүүгэдые болон түрэлхидэй харгалзагүй үлэһэн хүүгэдые ниигэмэй хангамжын талаар нэмэлтэ лаб найдуулганууд тухай” хуулида заһалтануудые оруулаа. Тус бэшэг баримтын ёһоор, үншэн хүүгэд болон түрэлхидэй харгалзагүй үлэһэн хүүгэд гүрэнэй дэмжэлгэ шууд абаха аргатай болохо.
Ниигэмэй хангамжын талаар хорооной түрүүлэгшэ Игорь Марковецэй хэлэһээр, ниигэмэй хангамжын арга хэмжээнүүдэй тоото – түлбэригүй халуун хоол, түлбэригүй гутал хубсаһан болон үргэн хэрэглээнэй хэрэгсэлнүүд, гэр байрада түлбэригүй байха гү, али тэрэнэй түлбэрииень гүйсэд хүсэлдүүлгэ, мүн баһа эмнэлгын түлбэригүй туһа хүргэлтэ ороно. Үшөө гэбэл, хэрбээ хүүгэд мэргэжэлэй болбосорол абажа байгаа һаа, түлбэритэ һургалтаһаа бюджет руу тэрэ шэлжэн орохо аргатай.
Һунгамалнууд саг үргэлжэ үншэн хүүгэдые дэмжэхэ хуулинуудые абажа байдаг. Тиин, 2021 ондо Буряад Уласай ниигэмэй халамжын зургаанууд үншэн үлбэр хүүгэдһөө гэр байрын үнэмшэлгэнүүдые абаха мэдүүлгэнүүдые хүлеэн абажа эхилһэн байха юм. Дэмжэлгын тиимэ арга хэмжээе Буряад Уласай Арадай Хуралай сесси дээрэ уласай хуули гаргалга тогтоогоо һэн. Гэр байрын үнэмшэлгэ абахын тула ямар эрилтэнүүд бииб гэхэдэ, 25 наһа хүсэһэн байха ёһотой, гэр байраар хангагдаха хүнүүдэй тоодо бэшүүлэгдэһэн байха ба үшөө ямар эрилтэнүүд бэ гэбэл, тэрэ сүүдлүүлһэн байха ёһогүй, сэдьхэл мэдэрэлэй үбшэнтэнэй ба хара тамхинай үбшэнтэнэй диспансернуудта бүридхэлдэ абтаагүй байха ёһотой юм. Тиихэдэ үншэн хүүгэд мэдүүлгэ оруулхаһаа урид 12 һарын турша соо ажалда хүдэлжэ байха ёһотой юм.
