Олзын хэрэг эрхилэгшэдтэ үзүүлэгдэһэн налогуудай хүнгэлэлтэнүүдэй ашаг туһыень Буряад Уласай Арадай Хуралай зүблэлэй суглаанда зүбшэн хэлсэгдээ. Налогуудай хүнгэлэлтэнүүдые табан жэлэй хугасаада үзүүлэгдэһэн мэдээсэлтэйгээр Буряад Уласай эдэй засагай сайд Екатерина Кочетова һунгамалнуудые танилсуулаа.
Тэрэнэй тэмдэглэһэнэй ёһоор, энээхэн хугасаа соо ажахы эрхилдэг субъектнүүдтэ нютаг можын налог татабаринуудайүзүүлэгдэһэн хүнгэлэлтэнүүд 5 млрд түхэригтэ хүрөө. Тэдэнэй 4,7 млрд түхэригынь – эдэ болбол олзын хэрэг эрхилэгшэдэй субъектнүүдэй эдэй засагай эдэбхижүүлэлтэ урмашуулгада шэглүүлэгдэһэн хүнгэлтэнүүд болоно, харин 435,6 сая түхэригынь – хүнгэлэлтэнүүдые абаһан түлэгшэдэй гаргаша доошолуулга хараалһан хүнгэлэлтэнүүд, болон 27,5 түхэриг хүн хониие ниигэмэй талаһаа дэмжэлгэ хангалгада шэглүүлэгдэһэн хүнгэлэлтэнүүд болоно гэжэ Буряад Уласай Арадай Хуралай хэблэл мэдээсэлэй албан дуулгана.
Бюджедэй, татабариин болон сангай талаар Арадай Хуралай хорооной түрүүлэгшэ Александр Бардунаев нютаг можын татабариин хүнгэлэлтэнүүдэй ашаг туһыень тэмдэглээ.
- Энэ зүблэлдэ болон тогтоолой түлэб бэлдэхэ үедөө манай хороон Эдэй засагай яаманай, Буряад Уласта Татабариин федеральна албанай хэлтэсэй, Хуули ёһоной хэлтэсэй түлөөлэгшэдэй хабаадалгатайгаар ажалай суглаа үнгэргэһэн байна. Татабариин хүнгэлэлтэнүүдэй, татабари түлэгшэдтэ хэрэгтэй байһан тухай болон ашаг туһатай байһан тухай бидэ нэгэтэ бэшэ тэмдэглэһэн байнабди, - гэжэ парламентын гэшүүн хэлээ.
