Буряад Уласай Арадай Хуралай эдэй засагай бодолгын, байгаали ашаглалгын ба байгаали хамгаалгын хорооной түрүүлэгшэ Анатолий Кушнаревай ударидалга доро Буряадай онсоор хамгаалагдадаг байгаалиин газар талмайнуудай ажаябуулгын талаар зүблөөн үнгэрбэ. Энэ асуудал Арадай Хуралай ээлжээтэ 22-дохи сесси дээрэ “Засагай газарай сагай” үедэ хэлсэгдэхэ байна.
Тус зүблөөндэ Буряад Уласай Арадай Хуралай һунгамалнууд Егор Олзоев, Игорь Бобков, Буряадай Засагай газарай түрүүлэгшын орлогшо Иван Альхеев, Буряадай байгаалиин нөөсэ баялигуудай болон экологиин сайд Сергей Матвеев, орлогшонь Антон Будунов, үндэһэн сэсэрлигүүдэй болон хүреэлэнгүүдэй захиралнууд, байгаали ашаглалгын һалбари хинаха талаар холбоото уласай албанай Буряадай хүтэлбэриин дарга Марина Дамдинова, “Кабанскын аймаг” гэһэн нютагай засагай байгууламжын захиргаанай толгойлогшын орлогшо Сергей Поломошин гэгшэд хабаадаа.
Холбоото уласай хэмжээнэй гурбан хүреэлэн-Байгалай, Баргажанай, Джергиин, хоер үндэһэн сэсэрлиг-Түнхэнэй болон Үбэр хизаарай, 16 байгаалиин дархан сээртэй газар нютаг ородог юм.
Энэ һалбарида гарадаг бэрхэшээлнүүдэй талаар олон асуудалнууд тус зүблөөн дээрэ хэлсэгдээ. Буряадай онсоор хамгаалагдадаг байгаалиин газар талмайнуудай ажаябуулгын талаар асуудалнуудые мартын 3-да үнгэрхэ сесси дээрэ бүри тодорхойгоор зүбшэн хэлсэгдэхэ юм.
Тон шухала бэрхэшээлнүүдэй тоодо газар талмайнуудые хуулиин ёһоор баталалга, аяншалгын һалбариие хүгжөөлгэ, нэмэлтэ мүнгэ оруулга, транспортын талаар инфраструктура хүгжөөлгэ, мүн бог шоройн талаар гарадаг асуудал ороно.
Зүблөөнэй дүнгүүдээр, Анатолий Кушнарев үгэ хэлэхэдээ, үнэхөөрөөшье, энэ һалбарида аргагүй олон бэрхэшэлнүүд гарана, бултанай оролдолгоор шиидхэхэ шухала гээд тэмдэглэһэн байна.
